बाढीले अवरूद्ध रसुवागढी नाका संचालनमा नआउँदा अर्बौंका सामान महिना दिनदेखि अलपत्र

काठमाडौं । रसुवागढी नाका बाढीले अवरूद्ध भएको एक महिना बित्दा पनि सडक सञ्चालनमा ल्याउन सरकारले पहल नगर्दा अर्बौंका सामान अलपत्र परेको गुनासो व्यापारीले गरेका छन् ।

व्यापारीहरूले केरूङ र तातोपानी नाकामा रोकिएका सामान काठमाडौंसम्म ल्याउने व्यवस्था मिलाइदिन सरकारसँग आग्रह गरेका छन् । गत असार २४ गते आएको बाढीले नेपाल–चीन सीमाको मितेरी पुल बगाउनुका साथै ठाउँ–ठाउँमा सडक अवरूद्ध हुँदा व्यवसायीहरुले दशैं–तिहारका लागि ल्याएका सामान नाकामै रोकिएका छन् ।

नेपाल हिमालय सीमापार व्यापार संघका अनुसार रसुवा र तातोपानी नाकामा करिब एक हजार कन्टेनर रोकिएका छन् ।

तर सरकारले अहिलेसम्म सडक सञ्चालन गर्न कुनै पहल नगरेको व्यापारीको भनाइ छ । नाकामा सामान रोकिँदा काठमाण्डौंका थोक बजारमा सामान आउन सकेको छैन । अर्बौं रूपैयाँ बराबरको सामान नाकामा रोकिँदा व्यापारको चक्र नै खल्वलिएको उनीहरुको भनाइ छ ।