काठमाडौं । रूपन्देही–३ मा कात्तिक १७ गते हुने उपचुनावका लागि रास्वपाले व्यापक तयारी अघि बढाएको छ । यससँगै रास्वपामा उम्मेदवारका आकांक्षीको लर्को लागेको छ ।
यहाँ रास्वपाले अनलाइन प्रणालीबाट आकांक्षीहरूको आवेदन माग गरेको छ । तर अहिलेसम्म कस–कसले आवेदन दिए भन्ने खुलेको छैन । यद्यपि, कम्तीमा १० जनासम्म आकांक्षी पुग्ने आकालन गरिएको छ ।
बुझिएअनुसार अहिलेसम्म पार्टी केन्द्रीय सदस्य कुसुम महर्जन, प्रदेश सदस्य र ०७९ का उम्मेदार जेपी गुप्ता (शेखर), रूपन्देही क्षेत्र नं ३ का सभापति मधु अर्याल, प्रदेश सदस्य प्रकाश ज्ञवाली, प्रदेश विभाग सदस्य डा.योगेन्द्र अग्रहरी, महिला नेतृ ज्ञानु पौडेल, पार्टीको जिल्ला कोषाध्यक्ष रहेकी भैरहवाकै रचना थापा, डा. लेखजंग थापा, अमेरिकाबाट निर्वाचनकै लागि आएका बुटवल सेमलारका शुलभ खरेल, भैरहवाका पार्थीवेन्द्र उपाध्यायको नाम चर्चामा छ ।
सुरूमा रूपन्देही बाहिरका पनि उम्मेदवार उठाउन सक्नेगरी छलफल चलाइएको थियो । तर, बाहिरी उम्मेदवार बनाउँदा राम्रो सन्देश नजाने भन्दै अहिले नेताहरूले स्थानीय उम्मेदारलाई नै प्राथमिकता दिएका छन् । अहिलेसम्म आकांक्षी आफैँले दाबेदारी गरेका छैनन् ।
पार्टीको विधिभन्दा बाहिर गएर पहिले प्रचार नगर्न नेताहरूले पहिले नै निर्देशित गरेका थिए । रास्वपाले यसअघि राप्रपा दिवंगत नेता दीपक बोहराका छोरा पाइलट गौरव बोहरालाई अघि सार्न खोजेको थियो । यसअघिको उपनिर्वाचनमा रास्वपाले तनहुँ र चितवनमा सफलता पाएपनि इलाम र बारामा पराजय भोगेको थियो ।
अहिले रूपन्देही–३ उपचुनावलाई संगठन विस्तार र पुनः जनमत निर्माणको अवसरका रूपमा लिएको नेताहरूले बताएका छन् । रास्वपाले निर्वाचन जित्ने लक्ष्य बनाएपनि अहिले चर्चामा रहेकाहरूबाट मूल नेतृत्व सन्तुष्ट छैन । यो बीचमा जिल्ला बाहिरबाट प्रभावशाली नेता आउनसक्ने संभावना पनि यथावत छ ।
अहिले संसदीय दल वैठकको बहानामा आएका रास्वपा शीर्ष नेताहरू उपचुनाव केन्द्रित हुँदै लगातार रूपन्देही–३ का विभिन्न स्थानमा पुगेका छन् ।
भैरहवा कारागारमा रहेका पार्टी सभापति रवि लामिछानेसँग समेत भेटेका उनीहरूले उपचुनाव मुख्य विषय भएको प्रतिक्रिया दिएका छन् ।
