बाढी तथा पहिरोको मारमा बलेफी, स्थानीय सरकारको भूमिकाप्रति नागरिकको असन्तुष्टि

सिन्धुपाल्चोक । पछिल्ला दिनमा निरन्तरको वर्षातसँगै आएको बाढी तथा पहिरोका कारण सिन्धुपाल्चोकको बलेफीका सयौं नागरिक मारमा परेका छन् । खासगरी साउन २ र ३ गतेको अविरल वर्षाले यहाँका थुप्रे ग्रामीण सडकमा क्षति पुर्याएको छ ।

बाढी तथा पहिरोका कारण थुप्रै गाउँ बस्तीसँगै बजार जोखिममा परेको बलेफी– ८का पूर्ववडाध्यक्ष चरीबहादुर तामाङले जानकारी दिएका छन् । बाढी तथा पहिरोले यहाँका थुप्रै व्यवसायिक फार्ममा पनि क्षति गरेको छ ।

बाढी तथा पहिरोले नागरिकको दैनिकी नै प्रभावित हुनेगरी असर गर्दा पनि यहाँको स्थानीय सरकारले कुनै काम नगरेको जनगुनासो छ ।

पछिल्लो समय गाउँमा भारइल ज्वरोको प्रकोप फैलिएको र बाटोघाटो विग्रेका कारण विरामीलाई अस्पताल लैजानसमेत कठिन भएको तामाङले बताएका छन् । तामाङका अनुसार विपदका बेला स्थानीय सरकारको उपस्थितिसमेत नभएका कारण यहाँका नागरिक दुखीत छन् ।