सिन्धुपाल्चोक । सिन्धुपाल्चोकको बाह्रविसेमा बन्न लागेको भोटेकोशी–५ जलविद्युत् आयोजनाले गरेको सार्वजनिक सुनुवाइ कार्यक्रममा लफडा भएको छ । केही स्थानीयले कार्यक्रमस्थलमै तोडफोड गरेपछि सार्वजनिक सुनुवाइमा लफडा भएको हो ।
स्थानीयले ‘गुण्डागर्दी’ शैलीमा सार्वजनिक सुनुवाइ बिथोल्न खोजेको आयोजनाको बुझाइ छ । केही स्थानीयले भने आयोजनाले आफूहरुलाई ‘थाहै नदिइ’ जबरजस्त सार्वजनिक सुनुवाइ गर्न खोजेको आरोप लगाएका छन् । यद्यपि, आयोजनाले स्थानीय ‘लोकप्रिय दैनिक’मा सूचना जारी गरेर सार्वजनिक सुनुवाइबारे जानकारी दिएको थियो ।
कार्यक्रममा आयोजनाको पक्षमा पनि नाराबाजी भएको थियो । कतिपयले आफ्नो क्षेत्रमा उक्त आयोजना आवश्यक रहेको भन्दै आयोजनाको पक्षमा नारा लगाएका थिए । आयोजनाको पावरहाउस बन्ने कल्लेरीका स्थानीय खुलेरै आयोजनाको पक्षमा उभिएका थिए ।
कार्यक्रममा लफडा भएपछि आयोजनाबारे बुझ्न र सोध्न पुगेका स्थानीय दुखी भएका छन् । उनीहरुले यस्तो गुण्डागर्दी पाराले आफ्नो ठाउँको विकास नहुने भन्दै चिन्तासमेत व्यक्त गरेका छन् ।
नगरपालिकाको कभर्ड हलमा आयोजना गरिएको सार्वजनिक सुनुवाइ बिथोल्दै केही स्थानीयले सार्वजनिक सम्पत्ति तोडफोड गरेका थिए ।
४६ मेगावाट क्षमताको उक्त आयोजनालाई कालिका हाइड्रोपावर कम्पनीले निर्माण गर्न लागेको हो ।
