कालिकोट । नेकपा एमाले केन्द्रीय पार्टी स्कुल विभागको योजना, कर्णाली प्रदेश पार्टी स्कुल विभागको समन्वय तथा कालिकोट जिल्ला कमिटीको आयोजनामा जिल्ला स्तरीय पार्टी प्रशिक्षण कार्यक्रम आजदेखि सुरु भएको छ।
तीन दिनसम्म चल्ने उक्त प्रशिक्षण कार्यक्रमको उद्घाटन नेकपा एमालेका उपमहासचिव तथा केन्द्रीय पार्टी स्कुल विभाग प्रमुख प्रदीप ज्ञवालीले गरेका छन् ।
कार्यक्रम उद्घाटनका क्रममा उपमहासचिव ज्ञवालीले कर्णाली प्रदेश सांस्कृतिक तथा प्राकृतिक हिसाबले अत्यन्त समृद्ध रहेको बताउँदै अब समग्र विकास र समृद्धिका लागि पार्टी पंक्ति एकजुट भएर लाग्नुपर्नेमा जोड दिए । विकास र परिवर्तनका लागि वैचारिक स्पष्टता अत्यावश्यक भएको उल्लेख गर्दै उनले यस प्रकारका प्रशिक्षण कार्यक्रमले त्यो उद्देश्य प्राप्त गर्न सहयोग पुर्यार्उने विश्वास व्यक्त गरे ।
ज्ञवालीले भौगोलिक विकटताका बाबजुद कर्णालीमा विकासको अपार सम्भावना रहेको उल्लेख गर्दै अब कर्णालीको ‘पछाडि परेको’ भन्ने पहिचान परिवर्तन गर्नुपर्ने धारणा राखे । उनले अर्गानिक उत्पादन, साहसिक पर्यटन र प्राकृतिक सम्पदामा भरपुर कर्णाली प्रदेश तथा कालिकोटलाई समृद्ध बनाउने अभियानमा पार्टी लाग्नुपर्नेमा जोड दिए ।
प्रशिक्षण कार्यक्रममा पार्टी स्थायी कमिटी सदस्य तथा संगठन विभाग प्रमुख काशीनाथ अधिकारी, कर्णाली प्रदेश इन्चार्ज गोरख बोगटी, केन्द्रीय पार्टी स्कुल विभाग सचिव घनश्याम कोइराला, राजबहादुर बुढा, सुन्दर लामिछाने, गेहेन्द्र दाहाललगायतले प्रशिक्षण दिने कार्यक्रम रहेको छ।
कर्णाली प्रदेशभर सञ्चालन गरिँदै आएको जिल्ला स्तरीय प्रशिक्षण शृङ्खलाअन्तर्गत कालिकोट छैठौँ जिल्ला हो। यसअघि दैलेख, सुर्खेत, हुम्ला, मुगु र जुम्लामा प्रशिक्षण कार्यक्रम सम्पन्न भइसकेका छन्।
