पशुपति धर्मशालाको विवाद उत्कर्षमा, तत्काल सबै गतिविधि रोक्न सँस्कृति मन्त्रालयको निर्देशन

काठमाडौं । संस्कृति, पर्यटन तथा नागरिक उड्डयन मन्त्रालयले पशुपति धर्मशालाबारेको विवादमा हस्तक्षेपकारी भूमिका खेलेको छ । मन्त्रालयले पशुपति क्षेत्र विकास कोषको निर्णय कार्यान्वयन रोक्न हस्तक्षेपकारी निर्देशन दिएको हो ।

मन्त्रालयले कोषका सदस्य–सचिवलाई बुधबार चिठी लेखेर धर्मशाला सञ्चालनको जिम्मा काठमाडौं महानगरलाई दिने निर्णय कार्यान्वयन नगर्न निर्देशन दिएको हो । सुरक्षाको कारण देखाउँदै मन्त्रालयले यस्तो निर्देशन दिएको हो । कोष सञ्चालक परिषदको असोज २० को बैठकले ‘सरकारी निकायसँग समन्वय गरी गौशाला–धर्मशाला व्यवस्थापन गर्ने’ निर्णय गरेको थियो ।

त्यसैका आधारमा कोषले असोज २२ गते गौशाला–धर्मशाला व्यवस्थापन गर्न काठमाडौं महानगरपालिकासँग सहमति गरेको थियो । त्यसलगत्तै काठमाडौं महानगरले गौशाला–धर्मशालामा नगर प्रहरी बल परिचालन गरेर त्यसका सञ्चालक मारवाडी सेवा समितिको बोर्ड हटायो र आफ्नो बोर्ड टाँग्यो । जसको मारवाडी सेवा समितिले यसको विरोध गर्दै आएको छ । र, त्यसयता विवाद बढिरहेको छ ।