काठमाडौं । चाडपर्व नजिकिएसँगै संघीय राजधानीबाट अनुमानित २० लाख नागरिक गृह जिल्ला फर्किन्छन्। विगतलाई हेर्न हो भने धेरैजसो यात्रु नागढुंगा नाका र त्यसमा पनि पृथ्वी राजमार्ग हुँदै बाहिरिन्छन् ।
हजारौं यात्रुहरू बाहिरिने क्रममा राजमार्ग क्षेत्रका होटल तथा खाजा घरहरूमा केही न केही खाना खाने गर्छन् । यसरी यात्रा गर्दा खाने खाना खाजामा धेरै यात्रुहरु ठगिने गरेको गुनासो आउने गर्छ । यसैलाई मध्यनजर गर्दै यात्रुहरू नठगियून् र उनीहरूले खाने खाना स्वस्थ होस् भन्ने उद्देश्यले जिल्ला प्रशासन कार्यालय धादिङले चाडपर्व लक्षित अनुगमन थालेको छ।
पृथ्वी राजमार्ग क्षेत्र वरपरका होटल, खाजाघर तथा पसलहरूमा अनुगमन तीव्र पारिएको छ। जिल्ला प्रशासन कार्यालय धादिङको नेतृत्वमा यात्रुहरूबाट धेरै गुनासो आउने होटललाई केन्द्रित गरी अनुगमन गरिएको छ भने केहीलाई जरिबाना तिराइएको छ। विशेषगरी होटल, रेस्टुरेन्ट तथा खाजाघरहरूलाई ध्यान दिँदै अनुगमन सुरु गरेको सरोकारवाला निकायको भनाइ छ।
कार्यालयले होटलमा सरसफाइ नगर्ने, एमआरपीभन्दा बढी मूल्य लिने, अखाद्य बस्तु बेच्ने गरेको पाइएमा कानुनअनुसार कारबाही गरिने चेतावनीसमेत दिएको छ ।
