बालेनविरुद्ध उत्रिइन् उपप्रमुख सुनिता

काठमाडौं । काठमाडौं महानगरपालिकाकी उपमेयर सुनिता डंगोलले मेयर बालेन शाहविरुद्ध अभिव्यक्ति दिएकी छिन् । मेयर बालेनको कार्यशैलीलाई लिएर उपमेयर सुनिता डंगोलले असन्तुष्टि जनाएकी हुन् ।

मंगलबार बसेको कार्यपालिका बैठकमा उपमेयर डंगोलले नदी किनाराको २० मिटर दायाँबायाँ छाड्नुपर्ने मापदण्डका विषयलाई लिएर जनता आतंकित र त्रसित भएको बताउँदै बालेनको विरोध गरेकी हुन् ।

त्यसपछि सर्वोच्च अदालतले दिएको नदी किनाराको मापदण्डसम्बन्धी आदेशलाई नै महानगरले सुसूचित गराउन खोजेको मेयर बालेन शाहले बताएका थिए । उपमेयर डंगोलले अदालतको आदेशलाई कसरी कार्यान्वयन गर्ने भन्ने पक्ष महत्वपूर्ण हुने बताएकी छन् ।