काठमाडौं । अमेरिकामा मृत्यु भएकी नेपाली चेली मुना पाण्डेको हत्या आरोपमा पक्राउ परेका बबिसिंह साहविरूद्ध दुईवटा मुद्दा दर्ता भएको छ ।
अमेरिकाको ह्यारिस काउन्टीको सरकारी वकिल कार्यालयले बबिविरूद्ध हत्या र गैरकानुनी हातहतियार विरूद्धको मुद्दा दर्ता गरेको हो ।
बबिलाई हत्या मुद्दामा ३ अक्टोबर र गैरकानुनी रूपमा हतियार बोकेर हिँडेको मुद्दामा अक्टोबर ५ मा अदालतमा उपस्थित गराइने बताइएको छ ।
सरकारी वकिल कार्यालयको स्टेटमेन्टमा डकैती गर्ने क्रममा अभियुक्तले मुना पाण्डेमाथि गोली चलाएको भनिएको छ । अभियुक्त बबिसिंह शनिबार राति सवा ८ बजे मुना बस्ने अपार्टमेन्टमा पुगेका थिए । पेस्तोलसहित पुगेका उनले केहीबेर ढोका ढक्ढकाएका थिए ।
ढोका खोलेर बाहिर निस्केकी मुनाले सोधखोज गर्न नपाउँदै ती अभियुक्तले कोठा भित्रतर्फ धकेलेको र आफूपनि प्रवेश गरी भित्रबाटै चुकुल लगाएको प्रहरी रिपोर्टमा उल्लेख छ ।
सिसीटिभी फुटेजअनुसार त्यतिबेला मुनाको हातमा सपिङ ब्याग, पर्स लगायत केही सामग्रीहरू देखिएको थियो । त्यसको एक घन्टापछि अभियुक्त घरबाहिर निस्किएका थिए ।
२१ वर्षीया मुना ह्युस्टन कम्युनिटी कलेजमा नर्सिङ पढ्दै थिइन् । उनी सन् २०२१ मा अध्ययनका लागि अमेरिका गएकी थिइन् ।
