काठमाडाैं । नेकपा माओवादी केन्द्रभित्र चर्किएको द्वन्द्व विस्फोटउन्मुख छ । खासगरी पार्टी अध्यक्ष पुष्पकमल दाहाल ‘प्रचण्ड’ र उपमहासचिव जनार्दन शर्माबीच बढेको द्वन्द्व सहजै साम्य हुने खालको पनि छैन ।
यतिसम्म कि, द्वन्द्वको उत्कर्षस्वरुप शर्माले पार्टीनै फुटाउने सम्भावना बढेको छ । शर्माको आक्रामक पारा देखेर प्रचण्ड केही खस्किएका पनि छन् । त्यसैले त स्थायी कमिटी बैठकबाट बाहिरिँदै प्रचण्डले भनेका थिए, ‘प्रभाकरले पार्टी फुटाउँछन् भन्ने हल्ला गलत हो ।’
तर, अझै जनार्दन थुमथुमिएका छैनन् । रुकुम पश्चिम–काठमाडौं सम्पर्क समन्वय समितिको एक कार्यक्रममा जनार्दनले दिएका अभिव्यक्तिबाट प्रष्ट हुन्छ कि, उनी अझै आक्रामक मुद्रामै छन् । जुनकुनै बेला जे पनि निर्णय गर्न सक्छन् ।
खासमा जनार्दनले पार्टी नेतृत्वप्रति उठाएका अधिकांश प्रश्न जायज छन् । धेरै माओवादी नेता तथा कार्यकर्तालाई पनि उनका सवालहरु ठिक लागेका छन् । तर बिडम्बना, शक्तिभक्त कार्यकर्ताहरुले उनलाई साथ दिएका छैनन् ।
यतिसम्म कि, स्थायी कमिटीमा एकजना पनि जनार्दनको पक्षमा देखिएका छैनन् । त्यसैले पार्टी फुटाउन चाहे पनि आफ्नो पक्षमा नेता, कार्यकर्ता नहुँदा जनार्दन माओवादीभित्रै खुम्चुनु परेको छ ।
देव गुरुङलाई महासचिव बनाएदेखिनै चाम्रिएका जनार्दन फेरि फुल्न र फैलन चाहन्छन् । तर, शक्ति सञ्चय नहुँदा उनलाई समस्या परेको छ । तर अझै पनि दुई प्रभावशाली नेताबाट पार्टीमा आन्तरिक दबाब झेलेका अध्यक्ष प्रचण्ड भने जसरी पनि गणितमा टिकिरहने ध्याउन्नमा छन् ।
किनकि, यसअघि पनि जनार्दन र वर्षमानबीच प्रचण्डले खेल्दै आएका थिए । अहिले जनार्दन र वर्षमान नजिकिएपछि प्रचण्डले पार्टी एकताको अर्को कार्ड फ्याँकेका छन् । विप्लवको नेकपा र माधवकुमार नेपाल नेतृत्वको नेकपा एकीकृत समाजवादीसँग पार्टी एकता गरेर बलियो हुने ध्यानमा रहेका प्रचण्डले अझै जनार्दनलाई फकाउने प्रयास भने गरिररहनेनै छन् ।
