काठमाडौं । नेपालको दुईदिने औपचारिक भ्रमणमा आएका भारतका विदेशसचिव विक्रम मिस्त्रीले उच्चस्तरीय राजनीतिक भेटवार्ता गरेका थिए ।
परराष्ट्र मन्त्रालयका सचिव सेवा लम्सालको मैत्रीपूर्ण निमन्त्रणामा नेपाल आएका विदेशसचिव मिस्रीले राष्ट्रपति रामचन्द्र पौडेल र प्रधानमन्त्री केपी शर्मा ओलीसँग शिष्टाचार भेट गरेका हुन् ।
त्यस्तै उनले नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डसँग समेत भेटवार्ता गरेका छन् । त्यस्तै मिस्रीले परराष्ट्रमन्त्री आरजु राणासँगै अन्य विभिन्न उच्चस्तरीय राजनीतिक व्यक्तित्वसँग भेटघाट गरेका छन् ।
यससँग मिस्रीको आगमन र उनले गरेका भेटघाटलाई लिएर अनेक कोणबाट टिकाटिप्पणी भइरहेका छन् । कतिपयले त ‘भारतीय विदेश सचिवसँग नेपाली स्वाभिमान बिकेको’ भनेरसमेत आलोचना गरिरहेका छन् ।
हुन पनि हो, एउटा देशको मामुल सचिवसँग नेपालका राष्ट्रपति र प्रधानमन्त्रीसँगै पूर्वप्रधानमन्त्रीहरुले समेत किन गोप्य भेटघाट गर्नुपर्यो ? नागरिकस्तरबाट प्रश्न उठ्नु स्वभाविक हो ।
