काठमाडौं । अहिले बंगलादेशकी प्रधानमन्त्री शेख हसिनालाई राजीनामा दिएर देश छाड्न बाध्य बनाउने आन्दोलनको नेतृत्वकर्ता नाहिद इस्लामको चर्चा व्यापक छ । प्रधानमन्त्रीलाई सत्ताच्यूत गराउने उक्त आन्दोलनको नेतृत्व गर्ने नाहिद को हुन् त ? धेरैको चासोको विषय छ ।
भारतीय समाचार संस्था एनडिटिभीका अनुसार नाहिद ढाका विश्वविद्यालयमा समाजशास्त्र अध्ययन गर्दैछन् । उनी मानव अधिकारकर्मीका रूपमा परिचित छन् । उनी पहिलेदेखि नै हसिनाको पार्टी अवामी लिगविरूद्ध खरो रूपमा बोल्थे । पार्टीमा आबद्धहरूलाई उनले ‘आतंककारी’ को संज्ञा दिएका थिए । हसिनाविरुद्धको आन्दोलनमा उनले सामाजिक सञ्जालको प्रचुर प्रयोग गरे । त्यसपछि हसिनाको सरकारले उनीमाथि अंकुश लगाउन खोज्यो ।
उनलाई जुलाई १९ को दिन ढाकाको सहुजबागस्थित साथीको घरबाट अपहरण गरियो । आँखामा पट्टी बाँधेर, हातमा हतकडी लगाएर उनलाई कुनै अनकन्टार ठाउँमा लगियो र चरम शारीरिक यातना दिइयो । त्यतिबेला अपहरण भएको दुई दिनपछि उनी अचेत अवस्थामा पूर्वाञ्चलको पुलमुनि फेला परेका थिए । त्यसपछि आन्दोलनले झन् उग्ररुप लियो ।
परिणामतः कोटाविरुद्धको आन्दोलनले हसिनालाई सत्ताच्यूत गरायो । र, नोबेल शान्ति विजेता मोहम्मद युनुसको नेतृत्वमा अन्तरिम सरकार गठन हुने स्थिति निर्माण भयो ।
