काठमाडौं । काठमाडौंको पशुपतिनाथमा जारी कोटीहोम महायज्ञमा कथा वाचनका क्रममा ‘गोरुले मयूर खान्छ’ भनेर ट्रोल बनेकी कथावाचक चन्द्रकला शखीले माफी मागेकी छिन् । उनले कथावाचनको क्रममा ‘जिब्रो चिप्लिएको’ भन्दै माफी मागेकी हुन् ।
पशुपति कोटीहोमका प्रवक्ता राजानन्द माण्डव्यले सामाजिक सञ्जालमार्फत कथावाचक शखीले ‘जिब्रो चिप्लिएको’ भन्दै माफी मागेको जानकारी दिएका हुन् ।
कथावाचक शखीले बुधबार कथा वाचनका क्रममा गोरुको प्रिय भोजन मयूर भएको बताएकी थिइन् । उनले भनेकी थिइन्, ‘ सिंहको अत्यन्त प्रिय भोजन भनेको गोरु हो । गोरुको अत्यन्त प्रिय भोजन मयूर हो । त्यस्तै मयूरको प्रिय भोजन सर्प र सर्पलाई अत्यन्तै मन पर्ने मुसा हो ।’
शखीलाई बचाउ गर्नेहरुले ‘मयूर भनेको फूल हो’ भनेर पनि कुतर्क गरिरहेका थिए । किनकि, यहाँ उनले ‘गोरुले फूल खान्छ’ भन्न खोजकै होइनन् । त्यसो भन्न खोजेको भए उनले ‘मयूरले सर्प खान्छ’ भन्ने थिइनन् । जे होस्, कथावाचक शखीले माफी मागिसकेकी छिन्, तर उनका अन्धभक्तहरु भने अनेक कुतर्क गर्दै जोगाउन खोजिरहेछन् ।
