भोटेकोशीका नागरिक बाढीको त्रासमा, गाउँपालिका अध्यक्षसहितका प्रतिनिधि युरोप सयरमा

सिन्धुपाल्चोक । अचेल सिन्धुपाल्चोकको भोटेकोशी गाउँपालिकाका नागरिक अत्यन्त त्रासमा बाँचिरहेका छन् । बाढी तथा पहिरोको उच्च जोखिममा रहेका यहाँका नागरिकलाई अचेल आकाशमा बादल मडारिँदा पनि डर लाग्छ । बेलुका सुतेपछि बिहान नहुन्जेलसम्म पनि बाढी र पहिरोको चिन्ताले नै सताउँछ ।

अझ सरकारले केही दिन भारी वर्षा हुने र सावधानी अपनाउनुपर्ने बताएदेखि यहाँका नागरिकमा झन् त्रास र बेचैनी बढेको छ । जोखिम बढेकै कारण गृह मन्त्रालयले एक सूचना जारी गरी बाढी तथा पहिरो प्रभावित जिल्लासंगै ७७ वटै जिल्लाका सिडिओलाई जिल्ला छाडेर बाहिर नजानसमेत निर्देशन दिइसकेको छ ।

तर विगतमा पनि बाढीले बितण्डा मच्चाएको र अझै पनि उच्च जोखिममा रहेको सिन्धुपाल्चोकको भोटेकोशी गाउँपालिकाका जनप्रतिनिधि भने अहिले युरोप भ्रमणमा मस्त छ । नागरिकको गाह्रो–साह्रोमा सँगै हुनुपर्ने जनप्रतिनिधिहरुले अप्ठेरो परेकै बेला साथ छाडेको भन्दै यहाँका स्थानीय आक्रोशित भएका छन् ।

भोटेकोशी गाउँपालिकाका अध्यक्ष पासाङ नोर्बु शेर्पा, एक नम्बर वडाका वडा अध्यक्ष राजु लामा र दुई नम्बर वडाका वडाध्यक्ष कुमार श्रेष्ठलगायतको टोली युरोप भ्रमणमा मस्त छ ।