काठमाडौं । झापाबाट कलाकारिताको सपना बुन्दै राजधानी प्रवेश गरेका खेम बानियाँ (सन्तोष)ले दर्जनभन्दा बढी म्युजिक भिडियोमा अभिनय गरिसकेका छन भने सामाजिक कथावस्तुमा आधारित ‘मैं राम्री’ टेलिसिरियलमा अभिनय गरेका उनी ‘बिक्की’ उपनामले समेत चर्चित छन । अब उहीँ खेमले चलचित्रमा समेत अभिनय गर्नेभएका छन । आगामी फागुन १६ गते विश्वभर एकसाथ रिलिज हुने तयारीमा रहेको चलचित्र ‘होस्टेल–३’ मार्फत उनले चलचित्रमा डेब्यु गर्दैछन ।
सशान कँडेलको निर्देशनमा निर्माण हुन लागेको चलचित्रको आइतबार बिहान ललितपुरको कार्यविनायक मन्दिरमा शुभ मुहूर्त गर्दै छायाङ्कन सुरु गरिएको छ । चलचित्रमा उखेम बानियाँ ‘सन्तोष’, ‘कुल ब्वाय’ अर्थात् पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, रोहन श्रेष्ठ र आशिष पुरुषलगायतका कलाकारहरूको अभिनय देख्न पाइनेछ।
अभिनेता आर्यन सिग्देलले चलचित्रमा होस्टेलको वार्डेनको भूमिका निभाउनेछन् भने अभिनेत्री परीक्षा लिम्बुले विशेष भूमिका निभाउनेछिन्। आइतबार सम्पन्न मुहूर्तमा आर्यन सिग्देल र परीक्षा लिम्बु बाहेक चलचित्रका अन्य सबै कलाकारहरूको उपस्थिति रहेको थियो ।
चलचित्रमा डेब्यु गर्न लागेको खेम उत्साहित छन । कलाकारितामा बेग्लै पहिचान बनाउन सफल भईसकेका उनलाई चलचित्रमा पनि अब्बल भएर पर्दामा देखिने आशा धेरै दर्शकले राखेका छन ।
खेम भन्छन्, ‘यो चलचित्र मेरा लागि एउटा अग्नि परीक्षा हो । म यो परीक्षालाई उत्कृष्ट बनाउन तत्पर भएर लागिपरेको छु । यहाँहरुले देखाउनु भएको मायालाई म निराशामा परिणत गर्न कदापि सक्दिनँ ।’
