भोटेकोशीमा खस्यो मोटरसाइकल, चालक सकुशल

सिन्धुपाल्चोक । सिन्धुपाल्चोकको बाह्रविसे–धुस्कुन–पिस्कर सडकखण्डको एकै स्थानबाट दिनहुँजसो मोटरसाइकल भोटेकोशी नदीमा खसेको छ ।

बाह्रविसे नगरपालिका– ४ मा पर्ने उक्त स्थानबाट भदौ १० गते एउटा मोटरसाइकल भोटेकोशी नदीमा खसेको थियो । उक्त मोटरसाइकल खसेको भोलिपल्ट फेरि त्यहीं ठाउँबाट अर्को मोटरसाइकल नदीमा खसेको त्रिपुरासुन्दरीका पूर्ववडाध्यक्ष सुकदेव रिसालले जानकारी दिए ।

रिसालका अनुसार भदौ ११ गते बिहान साढे ८ बजेतिर प्रदेश २–०५०–७७७२ नम्बरको मोटर साइकल भोटेकोशी नदीमा खसेको हो । मोटरसाइकल नदीमा खस्दा चालक नवराज खत्री र उनकी छोरी सामान्य घाइते भएको रिसालको भनाइ छ । खत्री आफ्नी छोरीलाई विद्यालय पुर्याउन जाँदै गर्दा दुर्घटना भएको हो ।

मोटरसाइकल नदीमा खसेदेखि निरन्तर खोजी भइरहेको तर अझैसम्म फेला नपरेको रिसालले बताए ।