काठमाडौं । नायिका पूजा शर्मा र गायिका समीक्षा अधिकारीबीच सामाजिक सञ्जाल फेसबुकमा दोहोरी चलेको छ । एउटा पडकास्टमा पूजा शर्माले नायक पल शाहको बँचाउ गर्दै दिएको अभिव्यक्तिपछि उनीहरुबीच दोहोरी चलेको हो । उक्त पडकास्ट सुनेपछि गायिका अधिकारीले आफूलाई पीडा नदिन नायिका शर्मालाई चेतावनीसमेत दिएकी छन् ।
सामाजिक सञ्जालमा एक पोस्ट समीक्षाले भनेकी छिन्, ‘अदालत नै पोडकाष्टहरु हुन् भने, न्यायाधीश नै यी र यस्ता कलाकारहरू हुन् भने उतिबेला यतैबाट फैसला गरिदिएको भएपनि हुन्थ्यो नि,’, उनले अगाडि भनेकी छन् ‘सत्य के हो ? कि उसलाई थाहा छ, कि मलाई थाहा छ । कि त भगवानलाई थाहा छ । आफैँ पनि छोरी भएर एउटा १४ वर्षकी कान्छी बहिनी बराबरलाई प्रहार गर्नु राम्रो हो र ? के सही ? के गलत ? छुट्याउन नसक्ने उमेरमा पनि मैले त मायाको तराजुमा आफूलाई जोख्न तयार भएँ र माफी दिएर साबित गरिदिएँ । सानालाई माया र ठूलालाई सम्मान गर्ने संस्कार सिकेर आएकी हुँ । हिजो ‘तिमि मेरो बहिनी’ भनेर आउनुभयो, मैले दिदी भनेँ, माने । अहिले पनि मानेकी छु । मान्छु, तर यसरी पिडा नदिनुस् प्लिज ।’
आफ्नो विषय बाहिर ल्याएर पूजाले फिल्म चलाउन खोजेको आरोप समेत समीक्षाले लगाएकी छन् । शर्माले पनि स्टाटस लेख्दै भनेकी छन्, ‘आज गायिका बहिनिले मलाई जोडेर मेरो भिडिओ सेयर गरेर जुन नकारात्मक सन्देश दिन खोजेकि छन्, त्यसमा मेरो गम्भीर आपत्ति रहेको छ..! त्यो भिडिओ सबै हेरेर मात्र प्रतिक्रिया दिन अनुरोध गर्दछु ! यो विषयमा म नबोलु भनेको र बोल्न आवश्यक पनि ठान्थिन; तर यसरी मेरो फिल्म आउनुभन्दा २–४ दिन अगाडि (पहिला पनि र अहिले पनि); मलाई टार्गेट गरिन्छ भने; म पनि बाध्य भएर बोलें । मिडियामा आएका मेरा सम्पूर्ण सामाग्रीहरू नितान्त पर्सनल हुन् । योबाहेक मेरा र ती बहिनिको पनि आफ्नो व्यक्तिगत जीवन होला । त्यसमा न म कहिले बोले र कहिले बोल्नेछु; र सम्बन्धित सबैलाई पनि नबोल्न अनुरोध गर्दछु । मुभी आउनुअघि शत्रुहरू त लाग्छन् नै !’
शर्माले स्टाटस पोस्ट गरेपछि कमेन्ट बक्स भने अफ गरेकी छिन् । पूजाले पोडकाष्ट कुराकानीमा ‘पललाई कानुनले बेकसुर प्रमाणित गरेको र यसबारे कसैले बोलिरहन जरुरी नभएको बताएकी थिइन् ।
