स्थायी बन्ध्याकरणपछि पनि बच्चा जन्मिएपछि अस्पतालविरुद्ध उजुरी

काठमाडौं । स्थायी बन्ध्याकरण भ्यासेक्टोमी गरिसकेपछि पनि बच्चा जन्मिएको भन्दै एकजना रुसी पुरुषले अस्पतालविरुद्ध मुद्दा हाल्ने भएका छन् । चारवटा बच्चा जन्माएपछि भ्यासेक्टोमी गरेका ती व्यक्तिले पाँचौँ बच्चा जन्मिएसँगै भ्यासेक्टोमी गरिदिने अस्पतालविरुद्ध मुद्दा हाल्ने तयारी गरेका हुन् ।

रुसको उफा सहरका ४५ वर्षीय म्याक्सिम नामका ती पुरुषले आफ्नो चौथो बच्चा भएसँगै सन् २०२२ मा भ्यासेक्टोमी गरेका थिए । त्यसका लागि उनी स्थानीय प्रोमेडिटसिना नामक बन्ध्याकरण क्लिनिक गएका थिए । जहाँ ३० हजार रुबल्स तिरेर उनले शल्यक्रिया गराएका थिए ।

त्यतिबेला शल्यक्रिया सफल भएको थियो र उनलाई केही घण्टामै क्लिनिकले डिस्चार्ज गरेको थयो । तर गत वर्ष उनकी पत्नीले एक्कासी आफू गर्भवती भएको बताएपछि उनी झस्किए । अन्ततः गत नोभेम्बरमा उनकी पत्नीले पाँचौँ बच्चा जन्माइन् । त्यसपछि उनी क्लिनिकविरुद्ध अदालत जाने तयारीमा जुटेका हुन् ।