लेखजंगको नियतमाथि रास्वपा कार्यकर्ताकै शंका

काठमाडौं । विवादित रास्वपा उम्मेदवार लेखजंग थापाको नियतमाथि रास्वपाका नेता–कार्यकर्ताले नै शंका गरेका छन् । बहुपत्नीको आरोप खेपिरहेका थापाले पार्टीको बैठकमा उपस्थित हुँदा गोप्य क्यामेरा प्रयोग गरेपछि उनको नियतमाथि प्रश्न उठेको हो ।

बुझिएअनुसार भदौ ३ गते थापासहित अन्य ८ जना उम्मेदवारका प्रतिस्पर्धी पार्टीको नियमअनुसार गोप्य बैठकमा बसेका थिए । मोबाइलसमेत लक्करमा राखी बैठक कक्षमा पुगेका प्रतिस्पर्धीहरूमध्ये डा. लेखजंग थापाले चस्मामा प्रयोग भएको क्यामेराबाट अडियो र भिडियो कैद गरी गोपनीयता भङ्ग गरेको बुझिएको छ ।

थापाले भिडिओ रेकर्ड गरेको थाहा पाएलगत्तै अन्य सहभागीले आपत्ति जनाउँदै चस्मा फुकाल्न भनेका थिए । र, उनीविरूद्ध अन्य सहभागीले पार्टीमा लिखित उजुरीसमेत दिएका थिए । तर, उक्त उजुरीको बेवास्ता गर्दै पार्टीले थापालाई नै उम्मेदवारको टिकट दिएको छ ।