काठमाडौं । कस्मिक एकेडेमीका निर्देशक लक्ष्मण घिमिरे सम्मानित भएका छन् । सार्क इन्टरप्रेनियर अफ दी इयरबाट निर्देशक घिमिरे सम्मनित भएका हुन् ।
सार्क एजुकेशनल कन्क्लेभ एण्ड अवार्ड समारोहमा निर्देशक घिमिरेसहित दक्षिण एसियाली मुलुकको शिक्षा क्षेत्रमा विशिष्ठ योगदान पुर्याउनेलाई सम्मान गरिएको हो ।
शिक्षालय नेपाल परिवारको आयोजना र विभिन्न शैक्षिक संघसंस्थाहरूको सहकार्यमा सम्पन्न यस कार्यक्रममा नेपाल, भारत, पाकिस्तान, बंगलादेश, श्रीलंका लगायत सार्क राष्ट्रहरूबाट विशिष्ट शिक्षाविद्हरूको उपस्थिति रहेको थियो।
कार्यक्रममा शिक्षा क्षेत्रमा लामो समयदेखि योगदान पुर्याउँदै आएका ख्यातिप्राप्त व्यक्तित्वहरूलाई विशेष सम्मान प्रदान गरिएको थियो।
कार्यक्रमका प्रमुख अतिथि पूर्व–प्रधानमन्त्री झलनाथ खनालले शिक्षाको गुणस्तर अभिवृद्धि, नवप्रवर्तन र क्षेत्रीय सहकार्यलाई समयानुकूल रुपमा अघि बढाउनुपर्ने आवश्यकता औँल्याए।
त्यस्तै, विशेष अतिथि वरिष्ठ शिक्षाविद् डा. विध्यानाथ कोईरालाले दक्षिण एशियाली शिक्षा प्रणालीमा सुधार र समन्वयको खाँचो रहेको भन्दै यस्ता कार्यक्रमहरूले साझा विकासको बाटो खुलाउने विश्वास व्यक्त गरे।
