विकासे आयोजनाका लागि प्रतिकुल बन्दै सिन्धुपाल्चोकको बाह्रविसे क्षेत्र

काठमाडौं । सिन्धुपाल्चोकको बाह्रविसे तथा भोटेकोशी विकासको प्रचुर सम्भावना बोकेको क्षेत्र हो । अझ यहाँको समृद्धिको मुख्य माध्यम नै जलविद्युत आयोजना हो । तर पछिल्लो अवस्था यस्तो छ कि, यहाँ कुनै पनि आयोजना अघि बढाउन एकदमै कठिन छ । स्थानीय नागरिक आयोजनाको पक्षमा हुँदाहुँदै पनि केही स्वार्थ समूहका कारण यहाँ जुनकुनै प्रोजेक्ट अघि बढाउन असहज छ । त्यसको पछिल्लो उदाहरण हो– आइतबार कालिका इनर्जी प्रालिले आयोजना गरेको सार्वजनिक सुनुवाइमा भएको लफडा ।

यहाँ बन्न लागेको ४६ मेगावाट क्षमताको भोटेकोशी– ५ जलविद्युत् आयोजनाका लागि आइतबार बाह्रविसे नगरपालिकाको प्राङ्गणमा नै सार्वजनिक सुनुवाइको आयोजना गरिएको थियो । तर कार्यक्रम सुरु हुनुभन्दा अघि नै केही मान्छेहरुले हुलदंगा गरेका कारण कार्यक्रम नै स्थगित हुनपुग्यो । आयोजनास्थलका स्थानीय आयोजनाकै पक्षमा हुँदाहुँदै पनि केही स्वार्थ समूहका कारण कार्यक्रमस्थलमा तोडफोडसमेत भएको आयोजनाले जनाएको छ । कार्यक्रमस्थलमा स्थानीयहरुले आयोजनाकै पक्षमा नारासमेत लगाएका थिए ।

सार्वजनिक सुनुवाइबारे आफूहरुलाई जानकारी नदिएको भन्दै केही मान्छेले आयोजनाविरुद्ध पनि नारा लगाएका थिए । तर आयोजनाले एक स्थानीय पत्रिकामा नै सार्वजनिक सुनुवाइको सूचना प्रकाशित गरेको थियो । अब आयोजनाले वडास्तरमा छलफल गरेर सार्वजनिक सुनुवाइको नयाँ मिति तोक्ने जनाएको छ । बाह्रविसे नगरपालिकाकै प्राङ्गणमा आयोजित सार्वजनिक सुनुवाइमा केही स्थानीयले गुण्डागर्दीको शैलीमा अराजकता मच्चाउँदा पनि स्थानीय प्रशासन मुकदर्शक बनेको आयोजनाको भनाइ छ ।