काठमाडौं । बलेफी गाउँपालिका वडा नं ६ ले आफ्नो वडासँग सम्बन्धित नागरिकसँग अन्तरक्रिया कार्यक्रम राजधानी काठमाडौंमा सम्पन्न गरेको छ । शनिबार आयोजित कार्यक्रममा आर्थिक वर्ष २०८२–८३ को योजनाहरू निर्माण तथा अघिल्लो वर्षको समीक्षा गरिनुको साथै स्थानीय आवश्यकता र विकासका सम्भाव्य क्षेत्रहरूबारे गम्भीर छलफल गरिएको थियो । व
डाध्यक्ष तेजबहादुर पराजुलीका अनुसार विभिन्न पेशा, व्यवसाय र अध्ययन लगायतका कारणले काठमाडौंमा बसोबास गरिरहेका वडावासीहरूसँग प्रत्यक्ष संवादमार्फत राय, सुझाव र सरोकार संकलन गर्ने उद्देश्यले कार्यक्रम आयोजना गरिएको हो । ‘स्थानीयस्तरमा योजनाको प्राथमिकता निर्धारणमा यस्ता कार्यक्रमहरू निकै उपयोगी हुने देखिएको छ’, उनले भने ।
कार्यक्रममा सहभागी सरोकारवालाहरूले पूर्वाधार विकास, सामाजिक रूपान्तरण, व्यवसायिक उन्नयन, कृषि तथा पर्यटन प्रवद्र्धन लगायतका विषयमा सुझाव प्रस्तुत गरेका थिए । सडक स्तरोन्नति, सिँचाइ सुविधा विस्तार, होमस्टे सञ्चालन, गुणस्तरीय शिक्षा र स्वास्थ्य सेवामा स्थानीय सरकारको सक्रियता बढाउनुपर्ने आवाज उठाइएको थियो ।
व्यवसायी तथा समाजसेवी भरत पराजुलीले स्थानीय विकासमा सरकारले मात्र नभई नागरिकहरू स्वयं पनि सकृय हुनु पर्नेमा जोड दिए । उनले स्थानीय उत्पादन वृद्धि गरी बजारिकरणमा सहयोग गर्ने समेत प्रतिवद्द्ता जनाए । निरन्तर संवाद र सहकार्यद्वारा योजना छनोट तथा कार्यान्वयन प्रभावकारी हुने भन्दै आगामी दिनमा यस्ता साझा कार्यक्रम नियमित गर्नुपर्नेमा सरोकारवालाहरूले आग्रह गरेका छन् ।
कार्यक्रममा रामकृष्ण पराजुली, गणेश तिमल्सिना, राजु चौलागाई, दिनेश दिक्षित, शुकुलाल तामाङलगायतले विकासका विभिन्न पक्षमा सुझाव प्रस्तुत तथा सहयोग र सहकार्यको प्रस्ताव राखेका छन् । साथै, राजु चौलागाईमार्फत जालवारी आधारभूत स्वास्थ्य केन्द्र र सातकन्या आधारभूत विद्यालयलाई एक–एक थान ल्यापटप पनि हस्तान्तरण गरिएको थियो ।
सञ्चारकर्मी विदुर आचार्यले सहजीकरण गरेको कार्यक्रममा सहभागीहरूले वडाध्यक्ष पराजुलीको सबैको सहभागिता सुनिश्चित गर्न गरिएको प्रयासको प्रशंसा गरेका थिए । अध्यक्ष पराजुलीले संकलित सुझावहरूलाई आगामी योजनाहरूमा समावेश गरी स्थानीय आवश्यकता सम्बोधन गर्ने प्रतिबद्धता जनाएका छन् ।
