विद्यालयस्तरीय क्रिकेट लिगका लागि हेलम्बु गाउँपालिका र क्रिकेट संघ सिन्धुपाल्चोकबीच ऐतिहासिक सम्झौता

सिन्धुपाल्चोक । सिन्धुपाल्चोक क्रिकेट संघले विद्यालय स्तरीय क्रिकेटको विकास र प्रवर्द्धनको लागि ऐतिहासिक पहल गर्दै जिल्लामा पहिलो पटक विद्यालय स्तरीय क्रिकेट लिग आयोजना गर्न लागेको छ। सिन्धुपाल्चोक जिल्लामा पहिलो पटक हुने यस प्रतियोगिताको आयोजनाका लागि हेलम्बु गाउँपालिकाका अध्यक्ष निमा ग्याल्जेलन शेर्पा र सिन्धुपाल्चोक क्रिकेट संघका पदाधिकारीबीच मंगलबार ऐतिहासिक सम्झौता भएको छ।

यस प्रतियोगिताको मुख्य उद्देश्य ग्रासरुट स्तरबाट क्रिकेट खेलको विकास गर्नु र युवा प्रतिभाहरूलाई अगाडि बढाउनु हो । हेलम्बु गाउँपालिकाले यस प्रतियोगिताको आयोजनाका लागि सिन्धुपाल्चोक क्रिकेट संघलाई दिएको सहयोगलाई ठूलो र महत्त्वपूर्ण बताइएको छ। यसले जिल्लाका युवा खेलाडीहरूलाई राष्ट्रिय तथा अन्तर्राष्ट्रिय स्तरमा पुग्ने मार्ग प्रशस्त गर्ने अपेक्षा गरिएको छ।

प्रतियोगिता परीक्षापश्चात् आयोजना गरिनेछ भने यसको निश्चित मिति छिट्टै सार्वजनिक गरिनेछ। यस प्रतियोगिताको माध्यमबाट सिन्धुपाल्चोकका विद्यार्थीहरूले आफ्नो खेल प्रतिभा देखाउने र क्रिकेट खेलमा आफूलाई अगाडि बढाउने ठूलो अवसर प्राप्त गर्नेछन्।

सिन्धुपाल्चोक क्रिकेट संघले यस प्रतियोगिताको माध्यमबाट जिल्लामा क्रिकेट खेलको लोकप्रियता बढाउने र युवाहरूलाई खेलकुदमा सक्रिय बनाउने लक्ष्य राखेको छ।