काठमाडौं । अहिलेका ऊर्जामन्त्री एवम् यसअघिका प्राधिकरण प्रमुख कुलमान घिसिङले लोकप्रियताको आडमा अर्बौं अर्ब रुपैयाँ भ्रष्टाचार खुलेको छ । लोडसेडिङ अन्त्य गरेको नाममा लोप्रियता कमाएका घिसिङले आफ्ना भाइ, भतिजाका नाममा अनेक कम्पनी खोलेर नियोजित रुपमा भ्रष्टाचार गरेको खुलेको हो ।
पछिल्लो समय नियमन आयोगको स्वीकृतिबिना भारतसँग विद्युत व्यापार सम्झौता गरेर ४३ करोड घोटला गरेको आरोप लागेका घिसिङ यसअघि पनि १२, १३ वटा ठूला भ्रष्टाचार काण्डमा मुछिएका छन् । कुलमान मिसिएको एउटा ठूलो भ्रष्टाचार काण्ड हो, स्मार्ट मिटर घोटला प्रकरण । दुई अर्बभन्दा बढी रुपैयाँ भ्रष्टाचार भएको उक्त प्रकरणमा घिसिङको प्रत्यक्ष संलग्नता देखिएको छ ।
उक्त घोटालासम्बन्धी अख्तियारमा उजुरी पनि परेको छ । र अहिले उक्त उजुरी विचाराधीन छ । उजुरीमा कुलमानसहितले नाम मात्रको टेन्डर आह्वान गरी स्मार्ट मिटर तथा विभिन्न सामग्री बजार मूल्यभन्दा ६ गुणा महंगोमा खरिद गरेको उल्लेख छ । त्यस्तै कुलमान मुछिएको अर्को भ्रष्टाचार काण्ड हो, अर्बको ट्रान्सफर्मर घोटाला प्रकरण ।
थानकोट–चापागाउँ–हरिसिद्धि प्रसारण लाइनमा बन्ने सबस्टेसनका लागि जग्गा अधिग्रहण प्रक्रिया नटुंगिँदै १५ प्रतिशत कमिसनको लोभमा नेपाल विद्युत प्राधिकरणले पावर ट्रान्सफर्मर पहिल्यै खरिद गरेको थियो । घिसिङकै नेतृत्वमा ६ अर्बभन्दा माथिको पावर ट्रान्सफर्मर लगायतका सामान किनेर भक्तपुरको खरिपाटीमा थन्क्याएर राखिएको थियो ।
अहिले ६ वर्षअघि नै खरिद गरेर थन्क्याइएका ती उपकरणहरू खिया लागेर काम नलाग्ने अवस्थामा पुगेका छन् । बुझिएअनुसार त्यतिबेला १५ प्रतिशत कमिसनको लोभमा पहिल्यै सामान किनिएको थियो । यसैगरी चार करोडमा हुने काम १४ करोडमा आफ्नै दाइको कम्पनीलाई जिम्मा दिएको आरोप पनि कुलमानलाई लागेको छ ।
विश्व बैंकको लगानी रहेको ढल्केबर सबस्टेसन निर्माणका क्रममा आफ्नो स्वार्थ जोडिएको कम्पनीलाई उनले कानूनविपरीत ठेक्का दिएका थिए । करिब ४ करोड बराबरको काम बाँकी रहेको ठेक्का बीचैमा रद्द गरी कुलमानले आफ्नै दाजुको लगानी रहेको कम्पनीलाई १३ करोडमा अवार्ड गरेका थिए ।
त्यस्तै खरिद प्रक्रियामा लागत अनुमानभन्दा बढीको बोलपत्र स्वीकृत गरेर कुलमानले एकै वर्षमा राज्यकोषको झन्डै १ अर्ब हाराहारीमा नोक्सानी पुर्याएको तथ्यांक छ । महालेखा परीक्षकको ५७ औं वार्षिक प्रतिवेदनमा पनि उक्त कुरा उल्लेख छ ।
प्रतिवेदनमा प्राधिकरणको मनोमानीकै कारण राज्यलाई ८४ करोड ७ लाख व्ययभार परेको पनि उल्लेख गरिएको छ । यतिमात्रै होइन, कुलमानले सोलार ग्रिडमा ८४ करोड अनियमितता गरेको प्रमाण यसअघि सार्वजनिक भइसकेको छ । यी त केही नमूना काण्डमात्रै हुन्, कुलमानले लोडसेडिङ हटाएको भन्ने लोकप्रियताको आडमा अर्बौंअर्ब भ्रष्टाचार गरेका छन् । तै पनि मान्छेहरु कुलमानलाई नै देउता मानिरहेका छन् ।
