बब्लु गुप्ताले मन्त्री बन्न भिक्टर पौडेललाइ दुई करोड बुझाएको दुर्गा प्रसाईंको आरोप

काठमाडौं । मेडिकल व्यवसायी दुर्गा प्रसाईंले युवा तथा खेलकुदमन्त्री बब्लु गुप्तामाथि आर्थिक लेनदेनको आरोप लगाएका छन् । सुकुम्बासी बस्तीमा डोजर चलाउने महानगरको अल्टिमेटम सकिएपछि त्यहाँ पुगेका प्रसाईंले गुप्ताले भिक्टर पौडेललाई दुई करोड रुपैयाँ बुझाएर गुप्ता मन्त्री बनेको दाबी गरेका हुन् ।

भिक्टर पौडेल काठमाडौं महानगरपालिकाका मेयर बालेन शाहलाई जिताउन महत्वपूर्ण भूमिका खेलेका व्यक्ति भएको उनको भनाइ छ । पौडेल ‘रुटिन अफ नेपाल बन्द’ नामक सामाजिक सञ्जालका सञ्चालक हुन् र मेयर शाहका नजिकका मानिन्छन् ।

सुकुम्बासी बस्तीमा उपस्थित प्रसाईंले आफूले त्यहाँका बस्ती भत्काउन नदिने प्रतिबद्धता जनाए। उनले मेयर शाहले गरिब र श्रमिक वर्गको उठिबास लगाएको आरोप पनि लगाए । प्रसाईंले अब फेरि सुकुम्बासीको घरमा डोजर चलाउन खोजे बालेकै घर भत्काइदिन पनि उर्दी जारी गरेका छन् ।