काठमाडौं । पछिल्लो समय रास्वपा रिफर्मेसनको चर्चा व्यापक छ । खासगरी नेतृ तोसिमा कार्कीले पार्टी रिफर्मेसनको बहस सतहमा ल्याएकी हुन् । कार्कीले पार्टीको नेतृत्व रिफर्मेसन गर्ने बहस चलाएपछि बालेनको समर्थनमा कुलमान घिसिङलाई रास्वपाको सभापति बनाउने चर्चा चुलिएको थियो । रविले सभापति छाड्न माने घिसिङलाई सभापति बनाएर जाने विषयमा रास्वपाको एउटा ठूलो तप्का सहमत पनि थियो ।
तर रविले सभापति छाड्न नमानेपछि रास्वपा रिफर्मेकसनको प्रोसेस नै भाँडिएको छ । यतिसम्म कि धनगढी उपमहानगरपालिकाका मेयर गोपी हमाल र जेन–जी प्रतिनिधि सुदन गुरुङलाई समेत समेटेर रास्वपालाई बृहत पार्टी बनाउनेबारे पटक–पटक छलफल भएको थियो । झण्डै तीन हप्तादेखि विभिन्न चरणमा निरन्तर छलफल भए पनि पार्टी प्रमुख को बन्ने भन्ने विषयमा कुरा नमिल्दा एकता प्रक्रिया नै अलमलमा परेको हो ।
आगामी फागुन २१ गतेको लागि तय भएको चुनावका लागि नयाँ दल नखोल्ने, बरु रास्वपामै मिसिएर लड्न उनीहरु सबै सहमत भइसकेका थिए । रवि लामिछाने नभए रास्वपा नचल्ने कुरामा उनीहरु सहमत नै छन् ।
त्यसैले रविलाई पार्टीमा सम्मानजनक सहभागिता गराउन पनि उनीहरू तयार छन् । तर, रास्वपा सभापति लामिछानेमाथि मुद्दा चलेकोले मुद्दा किनारा नलागेसम्म कार्यकारी भूमिकामा नबस्न उनीहरूले आग्रह गरेका छन् । उनीहरुको आग्रहलाई रविले भने मानेका छैनन् । रविलाई संरक्षक वा सर्वोच्च नेता बस्न आग्रह गरिएको बुझिएको छ । तर, कार्यकारी भूमिका छाड्न रवि तयार भएका छैनन् ।
सहकारी ठगी, सम्पत्ति शुद्धीकरण र संगठित अपराधको कसुरमा रवि एक वर्षदेखि कारागारमा छन् । सबैलाई समेट्नको लागि रविलाई केही समय कार्यकारी जिम्मेवारीमा नरहँदा राम्रो हुन्छ भनेर बालेनका सहयोगी कुमार बेनदेखि हामी नेपाल अभियानका संयोजक सुदन गुरुङ लगायतले सुझाव दिएका छन् ।
बालेन निकट उनीहरूले उर्जामन्त्री कुलमान घिसिङलाई रास्वपाको सभापति बनाउन प्रस्ताव पनि गरिसकेका छन् । त्यसो हुँदा पार्टी सर्वस्वीकार्य बन्ने र नेतृत्वमा कुनै समस्या नहुँदा चुनावमा आरामदायी बहुमत ल्याउन सकिने उनीहरूको बुझाइ छ रास्वपा छोडेर बसेकी सुमना श्रेष्ठ, फिल्म निर्देशक निश्चल बस्नेत, केही कलाकारहरू पनि रवि कार्यकारी भूमिकामा नरहे यही पार्टीबाटै चुनाव लड्न सकिने पक्षमा छन् ।
