काठमाडौं । पछिल्लो समय राष्ट्रिय स्वतन्त्र पार्टी (रास्वपा)लाई एकपछि अर्को धक्का लागि रहेको छ । खासगरी जेन्जी आन्दोलमा पार्टी सभापति रवि लामिकछानेले जेलब्रेक गरेपछि रास्वपाको ओरालो यात्रा सुरु भएको हो । ओरालो लागेको मृगलाई बाच्छाले पनि खेद्छ भनेझैं अहिले त पार्टी कार्यालय राखेको घरका घरबेटीले समेत रास्वपालाई छाडेर जान अल्टिमेटम दिएका छन् ।
रास्वपाको केन्द्रीय कार्यालय रहेको भवन घरधनी भरतमणि देवकोटाले तीन महिनाभित्र खाली गरिदिन आग्रह गरेका हुन् । देवकोटाले १० महिनाको भाडावापतको रकम र पार्टीलाई सापट दिएको ठूलो रकम नपाएको बताएका छन् । यससँगै सुरक्षाको कारणले पनि घर छोड्न भनिएको देवकोटाको भनाइ छ । अमेरिकामा रहेका देवकोटाले रास्वपाले घर छाड्न अल्टिमेटम दिएका हुन् ।
देवकोटाका अनुसार मासिक तीन लाख पचास हजार रुपैयाँमा घरभाडामा दिने सहमति बनेको थियो । रास्वपाको अनुशासन आयोगका प्रमुख रहेका देवकोटा अमेरिका गएपछि उनको स्थानमा अर्को व्यक्तिलाई कार्यवाहक तोकिएको थियो । पार्टीमा आफ्नो संलग्नता र घर भाडा फरक–फरक विषय भएको तर रास्वपाले त्यही अनुसारको व्यवहार नगरेको उनले दुखेसो गरेका छन् ।
स्थापनाकालमा बसुन्धरामा रहेको रास्वपाको कार्यालय त्यहाँ सानो भएको भनी देवकोटाको घर बनस्थलीमा सारिएको थियो । रास्वपा सभापति रवि लामिछाने दोस्रोपटक गृहमन्त्री हुँदा देवकोटा विज्ञ सल्लाहकार समेत नियुक्त भएका थिए । यससँगै रास्वपालाई अर्को पनि धक्का लागेको छ । रास्वपाका केन्द्रीय सदस्य डा. प्रभात अधिकारीले पनि पदबाट राजीनामा दिएका छन् ।
पार्टीका संस्थापक केन्द्रीय सदस्य अधिकारीले शुक्रबार राजीनामा दिएका हुन् । जेनजी आन्दोलनपछि पूर्व सहामहामन्त्री सुमना श्रेष्ठ र केन्द्रीय सदस्य हरि भट्टले यसअघि राजीनामा दिइसकेका छन् । त्यस्तै रास्वपाका नेता अनिलकेशरी साह पनि पार्टी छाडिसकेका छन् । यससँगै पछिल्लो समय रास्वपाका थुप्रै नेताहरु विभिन्न अभियोगमा पक्राउ परिरहेका छन् ।
चितवनका एक नेता नक्कली कागज कीर्तेमा पक्राउ परेका छन् भने नेता अरनिको पाण्डेलाई यौन दुव्र्यवहारको आरोप लागेको छ । यसअघि महामन्त्री मुकुल ढकालले नै पार्टी छाडिसकेका छन् । पार्टी परित्याग गर्नेहरुलाई फर्काउने विषयमा दुईदिने केन्द्रीय समिति बैठकमा समेत छलफल भएको थियो ।
