काठमाडौं । अहिले जताततै जेन–जी आन्दोलनको असर देखिइरहेको छ । अर्थतन्त्रदेखि शासन व्यवस्थासम्म हल्लाएको जेन जी आन्दोलनको सबैभन्दा ठूलो साइड इफेक्ट परेको छ– राष्ट्रिय स्वतन्त्र पार्टी (रास्वपा)मा । यतिसम्म कि, जेन जी आन्दोलनले वैकल्पिक शक्ति भनिएको देशको चौथो ठूलो दल रास्वपालाई कतै फुटको दिशातिर धकेलिरहेको त छैन ? भन्ने प्रश्न उठ्न थालेको छ ।
खासगरी पार्टी सभापति रवि लामिछानेले जेल ब्रेक गरेको वा गराइएको विषयले रास्वपामा लफडा भएको हो । रविकै कारण देशभरका कैदी भागेको आरोप खेपिरहेको रास्वपामा अहिले देखिएको विग्रह चानचुने खालको छैन । रविको जेलब्रेकमा विमति भएकै कारण पार्टी सहमहामन्त्री समेत भइसकेकी पूर्वसांसद सुमना श्रेष्ठले पार्टी नै छाडिन् ।
त्यस्तै सांसद एवम् पार्टी केन्द्रीय सदस्य तोषिमा कार्कीले फेसबुकमार्फत नै पार्टी नेतृत्व परिवर्तन हुनुपर्ने बताइसकेकी छिन् । यसैबीच मंगलबारदेखि सुरु भएको केन्द्रीय कमिटी बैठकमा बोल्ने अधिकांश सदस्यले पनि पार्टी नेतृत्वको विकल्प खोज्नुपर्ने धारणा राखेका छन् ।
बुझिएअनुसार कोशी, गण्डकी, लुम्बिनी र सुदूरपश्चिमका प्रदेश समिति सभापतिले रवि लामिछानेले पार्टी सभापतिबाट राजीनामा दिनुपर्ने धारणा राखेका छन् । कोशीका सभापति सरिन तामाङ, गण्डकीका राजन गौतम, लुम्बिनीका देवराज पाठक र सुदूरपश्चिमका प्रकाश विष्टले केन्द्रीय समिति बैठकमा रविको विकल्प खोज्नुपर्ने प्रस्ताव गरेका हुन् ।
रास्वपा बैठकमा सभापति लामिछानेको कारागार रिहाइ प्रकरणबारे पनि घनिभूत छलफल भएको छ । यो प्रकरणलाई लिएर पार्टीले आन्तरिकरुपमा छानबिन गर्नुपर्ने माग पनि केही नेताहरूले उठाएका छन् । पार्टी प्रवक्ता मनिष झाले बैठकअघि नै केन्द्रीय सदस्यहरूको ह्वाट्सएप ग्रुपमा छानबिनको माग गरेका थिए ।
मनिष स्वयं त्यस दिन नख्खु कारागारमा आगजनी भएको भिडिओमा देखिएपछि विवादमा मुछिएका छन् । बुझिएअनुसार सभापति लामिछाने स्वयं छानबिनका लागि सकारात्मक छन् । भदौ २४ गते नख्खु पुगेका केही नेता भने छानबिनको विपक्षमा रहेको बताइएको छ ।
