काठमाडौं । रुपन्देही–३ को उपनिर्वाचनका लागि उम्मेदवार छान्न राष्ट्रिय स्वतन्त्र पार्टी (रास्वपा) भित्र भएको प्राथमिक निर्वाचन ९प्राइमरी इलेक्सन०मा ६२ जना केन्द्रीय सदस्यमध्ये २७ जनाले मात्र मतदान गरेको पाइएको छ । केन्द्रीय सदस्यहरूले नै भोट नहालेपछि नेताहरूले आश्चर्य व्यक्त गरेका छन् ।
निर्वाचनमा ५० प्रतिशतभन्दा बढी केन्द्रीय सदस्यले भोट नहालेको पाइएको हो । मतदान मोबाइल एपमार्फत गरिएको थियो र यसका लागि भदौ १२ गते बिहान ७ बजेदेखि १३ गते साँझ ७ बजेसम्मको ३६ घण्टाको समय तोकिएको थियो ।
सुरुमा मोबाइल चलाउन नजान्ने वा नयाँ अभ्यास भएका कारण सामान्य सदस्यहरूको मत कम आएको अनुमान गरिए पनि सबै केन्द्रीय सदस्यहरूसँग स्मार्टफोन भएको अवस्थामा उनीहरूले मतदान नगर्नुले प्रश्न खडा गरेको छ । हालसम्मको अवस्थामा निर्वाचनमा लोकप्रिय मत ल्याउनेहरूमा पहिलो सूचीमा सुलभ खरेल, डाक्टर लेखजंग थापा र ज्ञानु पौडेल रहेको बनाइएको छ ।
यसैगरी दोस्रो लोकप्रिय मत ल्याउनेमा पाथिभेन्द्र उपाध्याय, कुसुम श्रेष्ठ र मधुप्रसाद आचार्य रहेको बुझिएको छ । निर्वाचनमा ९ जना उम्मेदवार छन् । प्राथमिक निर्वाचनमा रुपन्देही क्षेत्र नम्बर ३ का पार्टी साधारण सदस्य र केन्द्रीय सदस्य गरि कुल २ हजार ७ सय ७८ मतदाता थिए ।
जसमा कुल १ हजार ५ सय ६७ मत खसेको थियो । मतदानमा रुपन्देही क्षेत्र नम्बर ३ का पार्टी साधारण सदस्यको अंकभार ८०, तहगत समितिको १० र केन्द्रीय सदस्यको १० अंकभार थियो । यसैबीच महामन्त्री कविन्द्र बुर्लाकोटीले केन्द्रीय सदस्यबाट कम मत खसेको विषय आफूले पनि जानकारी पाएको बताएका छन् ।
उम्मेदवारसँग केन्द्रीय सदस्यहरुको चिनापर्ची नभएको हुनाले पार्टीमा भएकै नो भोटको व्यवस्थाअनुसार मतदानमा सहभागी नभएको हुनसक्ने उनको भनाइ छ । यद्यपि, रास्वपाको सचिवालय बैठकले नै आधिकारिक उम्मेदवार घोषणा गर्ने जनाएको छ । आइतबार नै उम्मेदवारका दाबेदार सबैजनाले जेलमा रहेका पार्टी सभापथि रवि लामिछानेलाई भेटेका छन् ।
यससँगै रास्वपाले प्राइमरी इलेक्सनबाट उम्मेदवार छान्ने भने पनि केन्द्र नै हाबी हुने देखिएको छ । स्थानीय नेताको मतभारलाई ५ प्रतिशतमात्रै कायम गर्नु र सचिवालयको मतभारलाई ५० प्रतिशत राख्नुले उम्मेदवार छनोटमा केन्द्र नै हाबी हुने प्रष्ट देखाउँछ ।
