काठमाडौं । सहकारी ठगी प्रकरणमा पुर्पक्षका लागि थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेको कारागार बसाइबारे अहिले अनेक बहस भइरहेको छ । अहिले खासगरी रविलाई कारागारमा एसीको सुविधा भए,नभएको विषयले सबैभन्दा धेरै चर्चा पाइरहेको छ ।
रविलाई कारागारभित्र कस्तो सुविधा दिइएको छ भनेर सोमबार राष्ट्रिय मानव अधिकार आयोगले रुपन्देही पुगेर कारागारको अवलोकनसमेत गरेको थियो । त्यसपछि यो विषयले झन् चर्चा पाएको हो । रास्वपा कार्यकर्ताले सभापति लामिछानेमाथि विभेद भयो भनेर गरेको दाबी गलत रहेको कारागार व्यवस्थापन विभागको तथ्यले नै देखाएको छ ।
अहिले देशभरका कारागारमा रविसहित ६ जना पूर्वविशिष्ट पदाधिकारी छन् । लामिछानेका अलावा पूर्वउपप्रधान मन्त्री एवं वहालवाला सांसद टोपबहादुर रायमाझी, पूर्वप्रदेश प्रमुख राजेश अहिराज कारागारमा छन् । यस्तै, गण्डकी प्रदेशका पूर्वमन्त्री दीपक मनाङे, पूर्वमन्त्री सञ्जय शाह ‘टकला’ र पूर्वगृहसचिव टेकनारायण पाण्डे पनि अहिले कारागारमा छन् ।
कारागार व्यवस्थापन विभागले सबैको लागि समान सुविधा दिने गरेको छ । कारागारमा थुनामा रहेका कैदी र थुनुवाले दैनिक ७ सय ग्राम चामल र ८० रूपैयाँ नगद सिदा पाउने गरेका छन् । जाडो र गर्मीका लागि एक–एक जोरगरी वर्षमा २ जोर कपडा र वर्षमा एकजोर ओढ्ने–ओच्छाउने कपडासमेत सरकारले उपलब्ध गराउने गरेको छ ।
कारागारभित्र कहाँ र कुन कोठामा बस्ने भन्ने कुरा सम्बन्धित कारागार प्रशासनले निर्धारण गर्ने गरेको विभागका अधिकारीहरू बताउँछन् । यस्तै, कारागारमा रहेको सबै बन्दीहरूको मानव अधिकार संरक्षणका लागि गुनासो संकलन गर्न र सम्भव भएसम्म समाधान गर्न देशभरका सबै कारागार प्रशासकहरूलाई सामूहिक निर्देशन गर्ने गरिएको गृहमन्त्रालयले बताएको छ ।
कारागारमा रहेका पूर्वविशिष्ट व्यक्तिलाई कानूनमा व्यवस्था भएका सुविधामा रोक लगाउन वा कानूनमा नभएका सुविधा उपलब्ध गराउन मन्त्रालय तथा विभागबाट मौखिक वा लिखित रूपमा परिपत्र वा निर्देशन नभएको बताइएको छ । भैरहवा कारागारमा रहेका लामिछानेको कोठामा एसी जडान गरिएकोबारे विवाद भइरहेको छ ।
रविका शुभेक्षुक र रास्वपा समर्थकले नै निजी खर्चमा कारागारमा एसी जडान गरेको र मिडियामा समाचार आएपछि अनधिकृत ढंगले जडान गरिएको एसी निकालिएको भन्ने विषय बाहिर आएको छ । कानूनमा नभएको सुविधा उपलब्ध गराउनेबारे लिखित वा मौखिक कुनै निर्देशन नभएको गृह मन्त्रालयले जनाएको छ ।
