काठमाडौं । कांग्रेस–एमाले गठबन्धनमा सहभागी नहुने निर्णय गरिसकेको राष्ट्रिय स्वतन्त्र पार्टी (रास्वपा)का मन्त्रीहरु बिहीबार बिहान राजीनामा बुझाउन प्रधानमन्त्रीनिवास बालुवाटार गए । तर, प्रधानमन्त्रीले केहीबेर फकाएपछि उनीहरु राजीनामा नदिइ फर्किए ।
प्रधानमन्त्री प्रचण्डले आफूले संसदबाट विश्वासको मत लिने र सहयोग गर्न भनेपछि राजीनामा नदिने भएको प्रमुख सचेतक सन्तोष परियारले जानकारी दिए ।
‘राजीनामा बुझाउन गएका थियौं । सम्मानीय प्रधानमन्त्रीले छलफल गर्नुपर्यो भन्नुभयो । कुरा गर्यौं,’ उनले भने, ‘आफ्नो संवैधानिक अधकिारको प्रयोग गर्छु, संसदलाई फेस गर्छु भन्नुभयो । हामीले पनि सम्मान गर्दै चाँडै गर्न भनेका छौं ।
कांग्रेस–एमाले गठबन्धनमा सहभागी नहुने निर्णय गरिसकेको रास्वपाले किन राजीनामा दिन हतार गर्यो ? फेरि प्रधानमन्त्रीले फकाउनेबित्तिकै किन राजीनामा नदिइ हिँड्यो ? चासोको विषय बनेको छ । र यसले रास्वपाको आलोकाँचोपनलाई झल्काएको छ ।
सरकारमा रास्वपाका सभापति रवि लामिछाने उपप्रधानमन्त्री तथा गृहमन्त्री छन् । यसैगरी उपसभापति डोलप्रसाद अर्याल श्रम तथा रोजगार मन्त्री, सुमना श्रेष्ठ शिक्षा मन्त्री र विराजभक्त श्रेष्ठ युवा तथा खेलकुदमन्त्री छन् ।
