सरकार टिकाउन एकैपटक पाँच मन्त्री थप्दै बागमतीका मुख्यमन्त्री लामा

काठमाडौं । बागमती प्रदेशका मुख्यमन्त्री बहादुरसिंह लामाले सरकार टिकाउन आजै पाँच मन्त्री नियुक्तिको तयारी गरेका छन् ।

मुख्यमन्त्री लामाले तीन जना मन्त्रीमा नियुक्ति हुने सांसदको नाम टुङ्गो लगाएका छन् । बुझिएअनुसार तीन जना सांसद माया श्रेष्ठ, गीता गुरुङ र गोविन्द लम्साललाई मन्त्री बनाउन लागिएको हो ।

कांग्रेस संसदीय दलमा बुझाइएको मुख्यमन्त्री लामाको अविश्वास प्रस्तावमा हस्ताक्षर गरेकी सांसद श्रेष्ठले मतदानमा भने मुख्यमन्त्री लामाको पक्षमा उभिएकी थिइन् । उनी र गीता गुरुङ दुई जना चितवनबाट बागमती प्रदेशमा प्रतिनिधित्व गर्ने सांसद हुन् भने गोविन्द लम्साल धादिङ जिल्लाका हुन् ।

मुख्यमन्त्री लामाको विपक्षमा उभिनेगरी पाँच जना मन्त्रीले राजीनामा दिएका थिए । अहिले कांग्रेसको भागमा परेको पाँच मन्त्रालय रिक्त छ ।