काठमाडाैं । माओवादीले छाडेपछि रास्वपा र राप्रपा मात्रै एकै ठाउँमा आएका थिए । प्रमुख प्रतिपक्षी दल माओवादी केन्द्रले राजनीति स्वार्थका लागि सत्तापक्षसँग साँठगाँठ गरेपछि रास्वपा र राप्रपा मात्रै एक ठाउँमा भएका थिए । तर अहिले उनीहरुबीच पनि फाटो देखिएको छ ।
खासगरी भिजिट भिसा प्रकरणमा गृहमन्त्रीको राजीनामा माग्दै आन्दोलन गरिरहेका प्रतिपक्षीहरुबीच नै फुट आएको हो । आफ्नो मागबाट पछि हट्दै माओवादीले सरकारसँग आत्मसमर्पण गरेपछि राप्रपा र रास्वपा अप्ठेरोमा परेका छन् । सरकारले गृहमन्त्रीको राजीनामा नभए संसदीय छानिबिन समिति बनाउनुपर्ने विपक्षीको मागसमेत पूरा गर्नै नसक्ने बताएपछि स्थिति असहज भएको हो ।
अहिले माओवादीलाई आफ्ना उपाध्यक्ष अग्नि सापकोटाविरुद्ध अदालतमा परेको मुद्दासँग भिजिट भिसा प्रकरणका गृहमन्त्रीको राजीनामा साटेको आरोप छ । जुन कुरालाई माओवादीले स्वीकारेको छैन । तर घटनाक्रमले उक्त आरोप सत्य भएको संकेत गर्छ । अहिले परिस्थिस्थितिले निचोरेर राप्रपा र रास्वपालाई एकै ठाउँ ल्याइपुर्याएको छ । तर यसको अवतरण के हुने भन्नेमा उनीहरु अष्पष्ट छन् । उनीहरुले ‘हामी विरोध पनि गर्दै गर्छौं, तपाईहरु संसद चलाउँदै गर्नुस्’ भनेपछि अहिले संसद खुलेको हो । र, बजेटमाथिको जारी छ ।
खासमा संसदमा बजेटमाथिको छलफलै रोकेर अवरोध गर्नुपर्ने हो कि होइन ? अध्यागमनको एकजना कर्मचारीमाथि अख्तियारले छानिबिन थाल्नेबित्तिकै गृहमन्त्रीले राजीनामा दिनुपर्ने हो कि होइन ? अख्तियारले नियन्त्रणमा लिएका अध्यागमनका सहसचिवले दैनिक ५० लाख बुझाउने गरेको भनेर बयान नदिएको पुष्टि भैसक्यो । अब कुनै मिडियाले नियोजितरुपमा समाचार लेखेकै कारण गृहमन्त्रीले राजीनामा दिनुपर्ने हो कि होइन ? यस्ता थुप्रै प्रश्नहरु उब्जिएका छन् ।
यसबीच कतिपयले भने रास्वपा र राप्रपाबीच कार्यगत एकताका लागि अहिलेको परिस्थिति एकदमै उपयुक्त भएको भनेर पनि टिप्पणी गरिरहेका छन् । कतिपय राजावादीले त रास्वपालाई पनि आफ्नो कित्तामा ल्याउने मौकाका रुपमा समेत हेरिरहेका छन् । तर रास्वपालाई यो आन्दोलन नै घाँडो हुने निश्चित छ । किनकि, भिजिट भिसा प्रकरणमा पूर्वगृहमन्त्री रवि लामिछानेदेखि थुप्रै मिसिएको तथ्य सार्वजनिक भइसक्यो । जे होस्, माओवादीले साथ छाड्दा पनि संसदमा रास्वपाले नाराबाजी गरेर आफ्नो तागत देखाइरहेको छ । यो तागतले रास्वपालाई नै ब्याकफायर नगरोस् !
