काठमाडाैं । कुनैबेला हरेक शुक्रबार सामाजिक सञ्जालमा स्टाटस लेख्ने बालेन साह अचेल मौन छन् । सरकारलाई सराप्दा–सराप्दा हैरान भएपछि ‘के माया लाग्छ र ?’ भन्नेसम्मको स्टाटस लेख्न भ्याएका बालेनले अचेल स्टाटस नलेख्नुलाई धेरैले चासोपूर्वक हेरेका छन् ।
यतिसम्म कि, उनले काठमाडौं महानगरका प्रमुख प्रशासकीय अधिकृत सरोज गुरागाईंलाई जबरजस्ती कार्यालय प्रवेश गराएको मात्रै होइन, आफ्ना सारथि नगरी प्रहरी प्रमुख राजुनाथ पाण्डेलाई हटाउँदा समेत केही स्टाटस लेखेनन् । पछिल्लो समय उनी निकै विवादित भइरहेका छन् । र काठमाडौं महानगरमा पनि केही न केही घटनाहरु भइरहेका छन् ।
हरेक घटनासँगै धेरैको चासो हुन्छ कि, बालेनको स्टाटस के आउला ? भनेर । तर उनी अचेल लेख्दैनन् । आफ्नी श्रीमतीलाई ट्राफिक प्रहरीले चेकजाँच गर्दासमेत सिंहदरबार जलाइदिन्छु भनेर स्टाटस लेख्ने बालेनको त्यो दम अहिले कता हरायो ? बालेनको अहिलेको मौनताबारे धेरैले धेरै कोणबाट विश्लेषण गरिरहेका छन् । कतिपयले बालेनले मौनता साँधेर शक्ति सञ्चय गरिरहेको कोणबाट हेर्नेहरु पनि धेरै छन् ।
कोही कोहीले भने बालेनले हार खाएको कोणबाट पनि विश्लेषण गरिरहेका छन् । केही क्रेजी फ्यानहरु भने बालेन अब झन् प्रभावकारी नायकका रुपमा आउने प्रतीक्षा गरिरहेका छन् । तर सत्य यो कि, बालेन आफूले काम गर्नै नसकेको तीतो वर्तमानबाट गुज्रिरहेका छन् । मेयर भएको तीन वर्षसम्म पनि उनले देखिने गरी केही काम गर्न सकेका छन् ।
उनका समर्थकहरुले काठमाडौंमा रुखको पात हरियो हुनुको जश पनि बालेनलाई दिइरहेका छन् । तर, भौतिकरुपमा काठमाडौं महानगरले केही काम गर्नै सकेको छैन । सुरुसुरुमा दुईचार ठाउँमा डोजर चलाएर हाइहाइ पाएका बालेनलाई आफ्नो साख जोगाउन कठिन भएको छ ।
अन्धभक्त समर्थकले जे–जे भने पनि काम गर्नै नसकेको आत्मग्लानीका कारण बालेन नराम्ररी निचोरिएका छन् । त्यसैले उनी अचेल कुनै स्टाटस लेख्दैनन् ।
