काठमाडाैं । सत्ताको नेतृत्व गरिरहेको दल नेकपाभित्र अहिले ७० वर्षे उमेर हदको विषय पेचिलो बनेको छ ।
पार्टीको विधान महाधिवेशन नजिकिँदै गर्दा एमाले नेताहरू ७० वर्षे उमेरहदसँगै भावी नेतृत्वको विषयमा कित्ताकाट हुन थालेका हुन् । एमाले नेता तथा कार्यकर्ता अहिलेका पार्टी अध्यक्ष केपी शर्मा ओली र पूर्व उपाध्यक्ष एवम् पूर्वराष्ट्रपति विद्यादेवी भण्डारीको पक्ष–विपक्षमा कित्ताकाट भएका हुन् ।
अहिले एमालेमा १८ जना पदाधिकारी छन् । र, उनीहरु सबै नै आ–आफ्नो कित्तामा विभाजित छन् । बुझिएअनुसार १८ पदाधिकारीमध्ये ८ जना पदाधिकारी खुलेरै पूर्वराष्ट्रपति भण्डारीको पक्षमा लागेका छन् ।
पार्टीका वरिष्ठ उपाध्यक्ष ईश्वर पोखरेलसँगै उपाध्यक्षहरू युवराज ज्ञवाली, अष्टलक्ष्मी शाक्य, विष्णुप्रसाद पौडेल, सुरेन्द्र पाण्डे, उपमहासचिव पृथ्वीसुब्बा गुरूङ, सचिवहरू गोकर्ण विष्ट र पद्मा अर्याल भण्डारीको पक्षमा उभिएको भनिएको छ । यसमा छविलाल विश्वकर्मा लगायतका केही नेताहरूको भने कित्ता नखुलेको बताइएको छ ।
