काठमाडाैं । पछिल्लो समय अतिविवादित बन्दै गएका काठमाडौं महानगरका मेयर बालेन साहको सचिवालयमा मात्रै ६ जना कर्मचारी खटिएको पाइएको छ । सूचनाअनुसार मेयर साहको सचिवालयमा सातौं तहका अधिकृतदेखि कार्यालय सहयोगीसम्म कार्यरत छन् ।
उनको सचिवालयको वरीयतामा सबैभन्दा माथि आउँछन्, स्वकीय सचिव भुपदेव साह । सातौं तहमा कार्यरत साहले मासिक करिब ६० हजार रुपैयाँ तलब खाँदै आएका छन् । त्यस्तै उनले दुई पाङग्रे एउटा सवारी साधनसँगै पेट्रोल तथा डिजेल र मासिकरुपमा सञ्चार भत्ता पाइरहेका छन् ।
त्यस्तै बालेनको सचिवालयमा काम गर्ने दोस्रो नम्बरका कर्मचारी हुन्– फोटोग्राफर विनय शाक्य र नविन भण्डारी । उनीहरु स्वकीय सहायकका रुपमा पाचौँ तहमा कार्यरत छन् । उनीहरुले मासिक ५०–५० हजार तलब खान्छन् ।
त्यस्तै पार्वती ओली र रेणुका गुरुङ प्रथम स्तरको कर्मचारीका रुपमा बालेनको सचिवालयमा छन् । कार्यालय सहयोगीका रुपमा कार्यरत उनीहरुको तलब करिब ३०–३० हजार छ । यससँगै महेश भण्डारी हल्ला सवारी चालक पदका कार्यरत रहेका छन् । उनले पनि ३० हजारभन्दा बढी नै तलब खान्छन् । महानगरपालिकाको वेवसाइटमा भने महानगर प्रमुखको सचिवालयमा १६ जना कार्यरत रहेका उल्लेख छ ।
सचिवालयको संख्याको कुरा त सामान्य हो । पछिल्लो समय मेयर साह अनेक विवादमा छन् । खासगरी करिब ७ महिनादेखि कार्यपालिका बैठक राख्न नसकेका कारण उनको आलोचना बढेको छ । नगर कार्यपालिकाका कोही पनि सदस्य आफ्नो पक्षमा पार्न नसकेका मेयर बालेनको दैनिकी र कार्यशैली पनि विवादित बनेको छ । रहस्यमयी कथाका राजकुमार जसरी प्रस्तुत भइरहेका बालेनले जनतासँग फेस गर्न नसकेको पनि आरोप छ ।
त्यस्तै आफ्नो कार्यकक्षमा जानका लागि मात्रै छुट्टै लिफ्ट बनाएको मात्रै होइन, बेग्लै जिमखाना बनाएको विषयले पनि बालेन विवादित छन् । अझ बजेट ल्याउने दिन नजिकिँदै जाँदा बालेनले गर्ने हरेक कामप्रति जनचासो बढेको छ ।
