काठमाडौं । बिहीबार दिनभरजसो नै काठमाडौं महानगरपालिकाभित्र तनाव भइरह्यो । खासगरी मेयर बालेन शाहले नगर प्रहरी र अरु कर्मचारीलाई आपसमा भिडाएपछि महानगरमा तनाव भएको हो । आफू नेपथ्यमै बसेर मेयर बालेनले आफ्ना कर्मचारीलाई भिडाउँदा उपमेयर सुनिता डंगोलले भने समन्वयकारी भूमिका निर्वाह गरेकी थिइन् ।
काठमाडौं महानगरमा तनाव बढ्नुको मूल कारण यहाँका प्रमुख प्रशासकीय अधिकृत सरोज गुरागाईंलाई काम गर्न दिने कि नदिने भन्ने हो । प्रमुख प्रशासकीय अधिकृत गुरागाईँ तीन महिना १४ दिनपछि बिहीबार कार्यालय फर्केका हुन् । गुरागाईं कार्यालय पुग्दा उपप्रमुख सुनिता डंगोल, अधिकांश कार्यपालिका सदस्य, वडाध्यक्षहरु र कर्मचारीले उनलाई स्वागत गरेका थिए । मेयर बालेन साहले भने गुरागाईंलाई अवरोध गर्न नगरप्रहरी परिचालन गरेका थिए ।
तर, नगरप्रहरीको अवरोध छिचोल्दै कर्मचारीले जनप्रतिनिधिले कार्यालय प्रवेश गराएका हुन् । कार्यालय प्रवेश गरेपछि पनि गुरागाईं आफ्नो कार्यकक्षमा बस्न सकेनन् । मेयर साहले उनको कार्यकक्ष लक गरिदिएका थिए । कर्मचारी र नगरप्रहरीबीच नै मुठभेड गराएर मेयर साह भने अदृष्य बनेका छन् ।
मेयर बालेनप्रति उपमेयर ढंगोलसहित अधिकांश कर्मचारी आक्रोशित, फेसबुकमा स्टाटस लेखेर महानगर नचलाउन सुझाव
काठमाडौं महानगरपालिकाका मेयर बालेन शाहप्रति उपमेयर सुनिता ढंगोलसहित अधिकांश कर्मचारीले आक्रोश पोखेका छन् । बिहीबार प्रमुख प्रशासकीय अधिकृतलाई महानगर प्रहरीले कार्यालय प्रवेशमा रोक्न खोजेपछि उनीहरु मेयर शाहमाथि खनिएका हुन् । नगर प्रहरीको घेरा तोड्दै प्रशासकीय अधिकृत गुरागाईंलाई कार्यालय प्रवेश गराएपछि बसेको अनौपचारिक बैठकमा उपप्रमुख डंगोलले मेयर साहको आलोचना गरेकी हुन् । डंगोलले हरेक घटनाक्रममा आफूहरु जानकार रहेको भन्दै मेयर साहलाई कोठामा बसेर निर्देशन नदिन चेतावनी पनि दिइन् । प्रमुख प्रशासकीय अघिकृत दोषी प्रमाणित भएको अवस्थामा कारवाही गर्न तयार रहेको भन्दै डंगोलले अहिले उनलाई दोषी प्रमाणित गर्न नसकेको उल्लेख गरिन् ।
तनावबीच काठमाडौं महानगरका प्रशासकीय अधिकृत गुरागाईंले सम्हाले जिम्मेवारी, अब कर्मचारीले तलब पाउने बाटो खुल्यो
३ महिना १४ दिनपछि काठमाडौं महानगरपालिकाका प्रमुख कार्यकारी अधिकृत सरोज गुरागाईं आफ्नो नियमित जिम्मेवारीमा फर्किएका छन् । कर्मचारी र जनप्रतिनिधिहरुको सहयोगमा उनी आज कार्यालय फर्किएर जिम्मेवारी सम्हालेका हुन् । महानगर प्रमुख बालेन साहले प्रशासकीय अधिकृतको कार्यकक्षमा ताला लगाइदिएका थिए । सो ताला फुटाएर कर्मचारीले उनलाई कार्यकक्षमा प्रवेश गराएका हुन् । यससँगै महानगरका कर्मचारीको रोकिएको तलब निकासा हुनेछ ।
काठमाडौं महानगरका कर्मचारीप्रति आक्रामक बने नगर प्रहरी प्रमुख राजु पाण्डे, जबरजस्ती गरे राम्रो नहुने चेतावनी
दर्शकबृन्द, काठमाडौं महानगरपालिकाका नगर प्रहरी प्रमुख राजु पाण्डे कर्मचारीहरूसँग आक्रोशित बनेका छन् । कर्मचारीले काम नगरेर कार्यालय कब्जा गर्न खोजेको भन्दै उनी आक्रोशित भएका हुन् ।
बिहीबार प्रमुख प्रशासकीय अधिकृत सरोज गुरागाईँलाई कार्यालयभित्र प्रवेश गराउने क्रममा नगर प्रहरी र कर्मचारीबीच टकराब भएको थियो । कर्मचारी र जनप्रतिनिधिले गुरागाईँलाई स्वागत गरेर कार्यालयभित्र प्रवेश गराउँदा नगर प्रहरीले रोक्ने प्रयास गरेको थियो । कर्मचारीले प्रशासकीय अधिकृतको कार्यकक्षको ढोकामा लागेको ताल्चा फुटाउने प्रयास गर्दा फेरि नगर प्रहरीले हस्तक्षेप गरेको थियो । त्यस क्रममा ढोकाको सिसा फुटेपछि नगर प्रमुख पाण्डे आक्रोशित बनेका थिए । उनले कर्मचारीलाई आफ्नो ठाउँमा बसेर काम गर्न चेतावनी दिएका छन् ।
किन प्रमुख प्रशासकीय अधिकृतको स्वागतमा गइनन् रास्वपाबाट चुनाव जितेकी वडाध्यक्ष ?
काठमाडौं महानगरका प्रमुख प्रशासकीय अधिकृत सरोज गुरागाईंलाई हाजिर गराउन सबै वडाका अध्यक्षहरू महानगर कार्यालय पुग्दा वडा नम्बर १६ को वडाअध्यक्ष रोजिना श्रेष्ठ भने अनुपस्थित भएकी छन् । वडा नम्बर १६ मा राष्ट्रिय स्वतन्त्र पार्टी (रास्वपा) बाट श्रेष्ठले जितेकी हुन् । कांग्रेस एमालेका वडाध्यक्षहरु प्रशासकीय अधिकृतलाई हाजिर गराउने पक्षमा थिए । १६ नम्बरकी वडाध्यक्ष श्रेष्ठले भने यसबारे आफूलाई कसैले खबर नगरेको बताइन् ।
