काठमाडौं । अहिले देशमा रास्वपा सभापति रवि लामिछानेपछि अरु दुई पात्रको चर्चा ज्यादा छ । तीमध्ये एक हुन्, विवादित छविका व्यवसायी दुर्गा प्रसाईं ।
विगतमा सांसदसँगै मन्त्री हुने लोभमा माओवादीबाट एमालेमा छिरेका र त्यहाँ टिकट नपाउने निश्चित भएपछि अभियन्ता भनेर हिँडेका प्रसाईंका गतिविधिले धेरैको ध्यान खिचेको छ । खासगरी झापाको बि एण्ड सी मेडिकल कलेजले सम्बन्धन पाउने कि नपाउने भन्ने विवादबीच ऋणले थिचिएपछि उनी आमऋणीलाई ऋणमुक्त गराउने भन्दै हिँड्न थाले ।
प्रसाईंको वरिपरी हिँड्नेबित्तिकै ऋण तिर्नै नपर्ने भनेपछि नहिँड्ने को ? त्यसपछि बिनासुझबुझ सर्वसाधारण नागरिकले दुर्गा प्रसाईंको जयजयकार नै गर्न थाले । जब पीडित जनताको साथ पाए, तब प्रसाईं क्रमशः उग्र बन्न थाले । मनलाग्दी बोल्न थाले, सामाजिक सञ्जालमा अनेक नाटक गर्न थाले ।
प्रसाईंको नौटंकीलाई कतिपय सोझा नागरिकले पत्याए पनि । त्यसकै जगमा विद्रोहको धम्की दिन थालेका प्रसाईलाई बुधबार पक्राउ पुजी जारी भएको छ । साइबर अपराधका कारण प्रसाईलाई पक्राउ पुजी जारी भएको हो । तर प्रसाईंले मधेशमा हुने कार्यक्रमलाई प्रभावित पार्न सरकारले आफूविरुद्ध पक्राउ पुजी जारी गरेको जिकिर गरिरहेका छन् । हुनतः प्रसाईंलाई यो व्यवस्थाले नै यस्तो नीच र उग्र बनाएको हो ।
विगतमा प्रचण्ड र ओलीका प्रिय पात्र बनेका प्रसाईं अहिले उनीहरुकै लागि घाँडो हुने परिस्थिति त्यस्तै निम्तिएको हो । यसमा प्रचण्ड–ओली नै जिम्मेवार छन् । बैंकको ऋण तिर्नै पर्दैन भनेर मनलाग्दी भाषण गर्दै हिँड्ने तागत कसले दियो, प्रसाईंलाई ? यो निकै गम्भीर विषय हो ।
अझै पनि उनका हरकर्तुतलाई मुकदर्शक बनेर हेर्ने हो भने ‘नपत्याउँदो खोलाले बगाउँछ’ भन्ने उखान चरितर्थ हुने निश्चित छ ।
त्यस्तै अहिलेका अर्का चर्चित पात्र हुन्, काठमाडौं महानगरपालिकाका मेयर बालेन शाह । अघिल्लो स्थानीय तह निर्वाचनपछि अधिकांश नेपालीको मन–मस्तिष्कमा गडिलो तरिकाले इन्ट्री मारेको एउटा नाम हो यो । उक्त निर्वाचनको पूर्वसन्ध्यामा उनी खुबै मिडियामा छाए । लगभग सबैजसो स्याटलाइट टिभीलाई अन्तरवार्ता दिए । चलेका पडकास्ट र युट्युव च्यानलसम्म आफैं धाए ।
उनले मासमिडियासँगै सोसल मिडियाको पनि भरपूर प्रयोग गरे । रुटिनेलगायतका ग्रुपमार्फत् आम युवामाझ पुगे । यसै पनि ¥यापरको हिसाबमा युवा समूहबीच परिचित बालेनलाई चुनावलक्षित क्याम्पेनले झन् चिनायो । सटिक ढंगमा गहकिलो तर्क गर्नसक्ने खुबीका कारण बालेनलाई धेरैले मन पराए । सुरुमा ख्यालख्याल ठानेका राजनीतिक दलका कार्यकर्ताले विस्तारै भन्न थाले, ‘बालेनले जसको बढी भोट काट्छ, उसले हार्छ ।’ तर बालेनचाहिँ भोटको डिजिटसहित आत्मविश्वासका साथ चुनाव जित्ने घोषणा गरिरहेका हुन्थे । चुनावको मुखैमा आइपुग्दा पनि दलका कार्यकर्तासँगै राजनीतिमा चासो राख्नेहरूले पत्याएका थिएनन् कि– बालेनले चुनाव जित्छन् भनेर ।
हप्तैपिच्छे ‘भोट बढाउने भयो बालेनले’ भन्दै २० हजारसम्म पु¥याउने आँकलन हुन थालेको थियो । तर, बालेनले चुनाव जिते । उनीहरू जिल खाए । चुनाव जितेपछि बालेनको झन् ‘हाई–हाई’ भयो । केही समय काठमाडौंको फोहोर संकलन र व्यवस्थापनको विषयले बालेनलाई विवादित पनि बनायो । तर, फोहोर उठेसँगै बालेनको विरोध पनि हरायो । त्यसपछि काठमाडौंमा सडक अतिक्रमण गरेर बनाएका संरचना भत्काउने अभियानले बालेनको चर्चा चुलीमा पुग्यो ।
बानेश्वरको अल्फाबिटा बिल्डिङदेखि सुन्धारास्थित काठमाडौं मलको आँगनमा डोजर घुमाएपछि बालेनका फ्यानहरूको फुर्ती थामिनसक्नुको भयो । त्यसपछि फुटपाथका व्यापारी हटाएर हौसिएका बालेन सुकुम्बासी बस्तीमा डोजर चलाउन पुगे । ‘सुकुम्बासीका नाममा सुनको सिक्री लगाउनेलाई गलहत्याउनु पर्छ’ भन्दै बालेन समर्थकले बानेश्वर र माइतीघरमा प्रदर्शन नै गर्न थाले । मान्छेको खुसीबिनाको सौन्दर्य निरर्थक हुन्छ’ भन्ने भावनामाथि पनि बालेनले डोजरै चलाए ।
सहरका सम्भ्रान्त वर्ग र दुःख नभोगेका युवाले बालेनलाई एकोहोरो हौस्याइरहे, हौस्याइरहेका छन् । परिणामतः अहिले बालेन कहिले सिंहदरबार जलाइदिन्छु भन्छन् त कहिले सिंहदरबार अगाडि लगेर फोहोर थुपार्छन् । तै पनि युवाहरु उनको हाईहाई नै गर्छन् ।
अझ उनी जति धेरै अराजक हुन्छन्, उतिधेरै प्रिय हुन्छन् । पछिल्लो घटनाक्रम र उनका स्टाटसले देखाएको छ कि, बालेन जति असहिष्णु त कोही पनि छैन । तर पनि उनका अनुयायीहरु उत्तिकै आकर्षित छन् ।
