काठमाडौं । काठमाडौंका नदी आसपास २० मिटर छाड्ने विषयमा अदालतले गरेको फैसलालाई लिएर प्रधानमन्त्री केपी शर्मा ओली र काठमाडौं महानगरका मेयर बालेन शाहबीच दोहोरीनै चलेको छ ।
सवाल–जवाफको निरन्तर शृङ्खलाअन्तर्गत मेयर शाहले बुधबार पनि फेसबुकमा स्टाटस लेख्दै प्रधानमन्त्री ओलीप्रति कटाक्ष गरेका छन् । मेयर शाहले काठमाडौंका नदी किनार थप २० मिटर कायम गर्नेबारे सर्वोच्च अदालतले दिएको आदेशमा अवसरवादी चरित्र कायम हुन थालेकोसमेत आरोप लगाएका छन् ।
उनले ५ वर्षअघि नै सर्वोच्चले गरेको आदेशमा अहिले आएर प्रधानमन्त्री लगायतका व्यक्तिहरूले असहमति जनाउनु र सर्वोच्चको आदेश पालना नगर्ने भनेर अडान कस्नुले ‘उहिलै मरिन् सासु, अहिले आए आँशु’ भन्ने नेपाली उखान चरितार्थ भएको पनि बताएका छन् ।
उनले भनेका छन्-
म काठमाडौँ महानगरको मेयरमा उम्मेदवारी दिन्छु कि भन्ने तपाईंले थाहा पाउनु भन्दा पनि ३ वर्ष अगाडि न्यायाधीशद्वय डा. आनन्दमोहन भट्टराई र सपना प्रधान मल्लको इजलासले २०७६ साउन २० गते १२ बुँदे आदेश जारी गरी नदीतटको मापदण्ड थप २० मिटर कायम गर्न भनियो। त्यति बेला अहिले प्रधानमन्त्री रहेका खड्ग प्रसाद ओली नै प्रधानमन्त्री हुनुहुन्थ्यो । तर त्यतिबेला प्रधानमन्त्री खड्ग प्रसाद ओली, बागमतीका मुख्यमन्त्री डोरमणि पौडेल, काठमाडौँ महानगरका मेयर विद्यासुन्दर शाक्य कोही पनि सो फैसला पुनरावेदनका लागि गएनन्। यसको अर्थ हो, त्यो फैसलामा यीमध्ये कसैको असहमति रहेन। हामीले खोज्ने जवाफ यति हो, त्यो बेला किन पुनरावेदनमा गएनन् ? कि भन्न पर्यो, त्यो बेला हाम्रो बुद्धि पुगेन। या भन्न पर्यो, अहिले हाम्रो दाउ अर्कै छ। उहिलै मरिन् सासु, अहिले आए आँशु किसिमको अवसरवादी चरित्र बारेमा प्रश्न गर्नै पर्छ।
