काठमाडौं । पूर्वप्रधानमन्त्री एवम् नेकपा एमालेका अध्यक्ष केपी शर्मा ओलीले काठमाडौं महानगरपालिकाका मेयर बालेन शाहप्रति आक्रोश व्यक्त गरेका छन् । मेयर शाहले सोमबार सामाजिक सञ्जाल फेसबुकमा लेखेको स्टाटसप्रति एमाले अध्यक्ष ओलीले आक्रोश व्यक्त गरेका हुन् ।
प्रतिनिधि सभाको बैठकबाट बाहिरिने क्रममा गिरिबन्धु टिस्टेटको बिषयमा सञ्चारकर्मीहरुले सोधेको प्रश्नमा उनले आक्रोशित हुँदै ‘बालेनलाई सोध्नू’ भन्ने प्रतिक्रिया दिएका थिए ।
मेयर बालेनले गिरिबन्धु टी– स्टेटको काण्ड लुकाउन र विषयान्तर गर्न राज्यको सम्पूर्ण शक्ति लगाएर न्युरोडमा आफूले बनाउन लागेको फुटपाथमा फेरि सडक बनाउन थालेको आरोप लगाएका थिए ।
उनले लेखेका थिए, ‘१० हजार करोडको कान्ड लुकाउन अर्को कान्ड गरेर जनता नझुक्काउनु होला माननीय केपि ओलीज्यू। झापा गिरिबन्धुमा बैना लिनेहरूलाई दुई वर्षभित्र गिरीबन्धुकै जग्गा दिलाउँछौं भनेर थम्थमाउनु भएछ । गिरीबन्धु चिया बगानको जग्गामा गर्न खोजेको नीतिगत घोटलामा तपाईंको सहभागीताको इतिहास हेर्दा त्यहाँ तपाईंलाई नभनी पात पनि हल्लन्छ भन्ने लाग्दैन ।’
पछिल्लो समय मेयर बालेन एमालेप्रति आक्रामक ढंगमा प्रस्तुत भइरहेका छन् ।
