काठमाडौं । सत्ताबाट बाहिरिएपछि माओवादी केन्द्रका अध्यक्ष पुष्पकमल दाहाल ‘प्रचण्ड’मा छटपटी बढेको छ । र, अब फेरि सत्तामा पुग्न सजिलो नभएको कल्पनाले उनी आत्तिएका पनि छन् । त्यहीं छटपटी र अत्यासको परिणामस्वरुप उनले अहिले विभिन्न राजनीतिक दलसँग एकताको पहल थालेका छन् ।
जसअन्तर्गत अहिले नेकपा माओवादी केन्द्र, एकीकृत समाजवादी र जनता समाजवादी पार्टी नेपालबीच पार्टी एकताको प्रक्रिया सुरु भएको भनिएको छ । यतिसम्म कि, माओवादी अध्यक्ष प्रचण्डले नेकपा एसका अध्यक्ष माधव नेपाललाई प्रधानमन्त्री बनाउने ललिपप देखाएर पार्टी एकताको प्रयास गरिरहेको बुझिएको छ । र, माओवादी केन्द्रसँग पार्टी एकता गर्ने सन्दर्भमा केही प्रगति भएको नेकपा एसनिकत स्रोतको दाबी छ ।
पार्टीभित्रै पनि घेराबन्दीको सामना गरिरहेका प्रचण्डले नेकपा एस र जसपालाई साथमा लिएर शक्ति बढाउन खोजेको प्रष्ट बुझिन्छ । हो, माओवादी केन्द्रको स्थायी कमिटीमा हरेक नेताले प्रचण्डमाथि प्रश्न उठाएका छन् । ती प्रश्नको जवाफ प्रचण्डले दिन सकिरहेका छैनन् । उनका कर्ममाथि मात्रै नभएर नेतृत्व क्षमतामाथि नै प्रश्न उठाइएका छन् । त्यहीं क्रममा प्रचण्डले एकता प्रयास थालेका छन् । यता, माधव नेपाल पनि पार्टी जोगाउनुपर्ने बाध्यतामा छन् ।
प्रधानमन्त्री केपी ओलीले संसद अधिवेशन अन्त्य गरेपछि राजनीतिक दलसम्बन्धी अध्यादेश ल्याएर भए पनि पार्टी फुटाइदेलान् भन्ने डरमा छन्, माधव नेपाल । हुन त, राजेन्द्र पाण्डेसहितको एउटा टोली माओवादीभन्दा एमालेसँग मिल्नुपर्ने तर्क गरिरहेका छन् ।
