संविधान संशोधननै गर्न नहुने धर्मग्रन्थ होइन: प्रधानमन्त्री ओली

काठमाडौं । प्रधानमन्त्री एवं नेकपा एमालेका अध्यक्ष केपी शर्मा ओलीले देशमा संविधान संशोधनका विरुद्ध भ्रम फैल्याउनेहरु सक्रिय भएको आरोप लगाएका छन् ।

नेकपा माओवादी केन्द्र लगायतका प्रतिपक्ष दलहरुले प्रतिगमनका लागि कांग्रेस–एमालेले संविधान संशोधनको विषय उठाएको भन्दै आलोचना गरिरहेका बेला प्रधानमन्त्री ओली यस्तो बताएका हुन् । उनले अहिलेको सरकारले स्टन्टका लागि नभइ जनता र देशका लागि काम गर्ने पनि बताए ।

ललितपुरको च्यासलस्थित एमाले मुख्यालयमा आयोजित पार्टी पदाधिकारी तथा केन्द्रीय सदस्यहरुको शपथग्रहण समारोहमा बोल्दै उनले सरकार र सत्तारुढ गठबन्धनले कुनैपनि खालको भ्रम सृजना गर्नेगरी काम नगर्ने प्रतिबद्धता जनाएका छन् ।

संविधानलाई धार्मिक ग्रन्थ वेद, बाईवल, कुरान जस्तो असंशोधनीय दस्तावेजको रुपमा प्रस्तुत गर्न खोजिएको भन्दै उनले त्यस्तो भ्रममा नपर्न पनि सबैलाई आग्रह गरे ।