काठमाडौं । नेकपा एमालेका अध्यक्ष केपी शर्मा ओली चौथोपटक प्रधानमन्त्री भएसँगै उनको काँधमा गम्भीर चुनौतीका चाङ थोपरिएका छन् । विगतमा पनि अनेक चुनौती छिचोलेरै अघि बढेका ओलीले यसपालि के गर्लान् ? चासोको विषय बनेको छ ।
सन्काहा स्वभाव र अहंकारी नेताको ट्याग भिराइएका ओलीलाई अहिलेका चुनौतीको सामना गर्नु चानचुने कुरा छैन । अनेक चुनौतीमध्ये ओलीका प्रमुख पाँच चुनौती यसप्रकार छन्–
चुनौती नम्बर नम्बर १: सरकार टिकाउनु
विभिन्न सानातिना दलसहितको अहिलेको सरकार लामो समयसम्म टिकाउनु ओलीका लागि निकै ठूलो चुनौती हो । प्रमुख प्रतिपक्षी दल नेकपा माओवादी केन्द्रले ‘विश्वासको मत लिनै सकस हुने’ दाबी गरिरहेका बेला चारतिर फर्किएका विभिन्न दलको चोचोमोचो मिलाउने कुरा कठिन छ ।
भागबण्डामा अलिकति चित्त नबुझ्नेबित्तिकै समर्थन फिर्ता लिने जोखिम पनि उत्तिकै छ । त्यसैले झिनामसिना सबै दलको चित्त बुझाएर सरकार टिकाइराख्नुनै ओलीको सबैभन्दा ठूलो चुनौती हो ।
चुनौती नम्बर २ः संविधान संशोधनका लागि दुईतिहाइ जुटाउनु
अहिले कांग्रेस र एमालेबीच गठबन्धन हुनुको खास कारण नै ‘संविधान संशोधन’ हो भनिएको छ । त्यसैले संसदका दुई ठूला दल मिलेर सरकार बनाउनुको औचित्य पुष्टि गर्न पनि संविधान संशोधन गर्नैपर्ने हुन्छ ।
अहिले दुई दलबीच समानुपातिक प्रतिनिधित्वका आधारमा आउने सांसदलाई राष्ट्रियसभा सदस्यमा लैजाने, उपराष्ट्रपतिलाई राष्ट्रिय सभाको अध्यक्ष बनाउने, प्रदेशसभामा समानुपातिकतर्फको प्रावधान हटाउने, पालिकाको संख्या घटाउनेलगायत विषयमा सहमति भएको भनिएको छ । तर त्यसका लागि आवश्यक पर्ने दुई तिहाई समर्थन जुटाउने कुरा चानचुने छैन ।
अहिले प्रतिपक्षमा रहेका तेस्रो दल माओवादी केन्द्रका ३२ र चौथो दल रास्वपाका २१ सिट र एमालेबाटै विभाजन भएर बनेको नेकपा एकीकृत समाजवादी पार्टी (नेकपा एस)को १० सिट छ ।
सरकारलाई उनीहरुको साथ र सरकारमा सहभागी साना दलहरूको मर्म र भावनालई ख्याल गरेर अघि बढ्न कठिन छ । र, प्रतिनिधिसभाबाट संविधान संशोधन प्रस्ताव पारित भए पनि राष्ट्रियसभामा गएर अड्किने सम्भावना व्यापक छ । किनकि, राष्ट्रियसभाको सबैभन्दा ठूलो दल माओवादी केन्द्र नै संविधान संशोधनको विपक्षमा उत्रने निश्चित छ ।
चुनौती नम्बर ३: सुशासन कायम गर्नु
कांग्रेस–एमाले गठबन्धन सरकारले भ्रष्टाचार नियन्त्रण गरी सुशासन कायम राख्नुपर्ने चुनौती छ । अघिल्लो सरकारले सुशासनको भाषण छाँटेर केही पनि काम नगरेको आरोप लागेको थियो । र, अहिलेको सरकारले केही न केही गरेरै देखाउनुपर्ने छ ।
चुनौती नम्बर ४: समृद्धिको नारालाई व्यवहारमा उतार्नु
कतिपयले प्रधानमन्त्री ओलीलाई भिजिनरी नेताका चित्रण गर्छन् त कतिले हावादारी गफ दिने नेताका रुपमा । तर जे पनि यसपालि समृद्धिको पक्षमा केही न केही महत्वपूर्ण काम गरेर देखाउनैपर्ने चुनौती छ, ओली सरकारसँग । विगतमा पानी जहाज, रेल र सुरुङ निर्माणबारे दिएका गफलाई व्यवहारमा उतार्न ओलीले यसपालि निकै कसरत गर्नुपर्ने देखिन्छ ।
यी सबै चुनौतीका बाबजुद प्रधानमन्त्री ओलीसँग एउटा सुन्दर अवसर छ– सत्कर्म गरेर स्वर्णअक्षरमा नाम लेखाउने । ओलीले उल्लेखित चुनौतीको सामना गर्दै सफल प्रधानमन्त्री हुन्छन् कि हुँदैनन् ! त्यो भने समयक्रमले नै बताउनेछ ।
