काठमाडाैं । सरकारको नेतृत्व गरिरहेको दल रास्वपाले भदौ २१ गतेभित्र सम्पन्न हुनेगरी महाधिवेशनको तयारी थालेको छ । रास्वपाले वडा, निर्वाचन क्षेत्र, जिल्ला र प्रदेश कमिटीसँगै महाधिवेशन प्रतिनिधि पनि यसबीचमा योजना बनाएको छ ।
स्थापनाको पहिलो वर्षदेखि नै रास्वपाले महाधिवेशनको तयारी गरिरहेको थियो । तर विविध आन्तरिक कारण महाधिवेशन धकेलिँदै आएको छ । यसअघि पछिल्लो पटक फागुन ७, ८, ९ गतेलाई महाधिवेशनको मिति तोकिएको थियो ।
तर फागुन २१ गते चुनाव हुने भएपछि पुसमा बसेको बैठकले महाधिवेशनको मिति संशोधन गर्दै निर्वाचन सकिएको ६ महिनाभित्र गरिसक्ने निर्णय गरेको थियो । अब भदौमा हुने महाधिवेशनले पार्टीको नेतृत्वमा कसलाई चुन्छ भन्ने कुरालाई धेरै चासोपूर्वक हेरिएको छ । पार्टीमा बालेन शाहको प्रवेशका कारण लफडा हुनसक्ने धेरैको अनुमान छ ।
अहिलेकै अवस्थामा पार्टी सभापति रवि लामिछाने नै फेरि नेतृत्वमा दोहोरिने सम्भावना छ । तर उनी विभिन्न मुद्दामा जेलिएका कारण उनको विकल्प खोज्नुपर्ने आवाज पनि उठ्न थालेको छ । यससँगै रास्वपा महामन्त्री बालेन समूहका भूपदेव शाहको चर्चा व्यापक छ । प्रतिनिधिसभा सदस्य चुनाव हारेका भूपदेवलाई बालेनले नै पार्टीको महामन्त्री बनाउन चाहेको चर्चा छ ।
