काठमाडौं । विवादास्पद व्यापारी मालपानीको गाडी चढेको विषय होस् या फेसबुकबाट मनलाग्दी सत्तोसराप गरेको विषय नै किन नहोस् । वा, प्रश्नबाट भाग्ने मामिला होस् । अनेक कारण रास्वपाका वरिष्ठ नेता एवम् झापा– ५ का उम्मेदवार बालेन साह झनपछि छन विवादित बनिरहेका छन् ।
खासगरी बालेनको प्रवृत्तिका रास्वपाकै नेताहरु असन्तुष्ट हुन थालेका छन् । रास्वपामा बालेन इन्ट्रीलाई नै नरुचाएका कतिपय कार्यकर्ताले त खुलेरै बालेनको आलोचना गर्न थालेका छन् ।
अझ पछिल्लो समय चुनाव प्रचारका क्रममा विवादास्पद व्यापारी मालपानीको गाडी चढेको विषयमा त रास्वपाका जिम्मेवार नेताहरुले नै असन्तुष्टि व्यक्त गरेका छन् । रास्वपा प्रवक्ता मनिष झाले एउटा अन्तरवार्तामै भनेका छन् कि ‘बालेनले त्यसरी चुनाव प्रचारमा व्यापारीको गाडी प्रयोग गर्नु गलत हो, उनले गरेका सबै गल्तीको हामी जिम्मा लिन सक्दैनौं ।’ झाको यो भनाइले प्रष्ट पार्छ कि रास्वपाभित्र बालेनको व्यवहारलाई सहजै पचाइएको छैन ।
यससँगै बालेनका अन्य व्यवहार पनि त्यस्तै छ । उम्मेदवारी दर्ता गर्न झापा गएर र पूर्वका विभिन्न जिल्ला घुमेर काठमाडौं फर्केका बालेन रास्वपाको कार्यालयमै नगइ पश्चिमतिर लागेका छन् । यसले बालेन राम्रोसँग रास्वपाभित्र अन्तरघूलन हुन नसकेको प्रष्ट पार्छ ।
हुन पनि हो, हिजो अन्तयन्त विषय परिस्थितिमा पनि पार्टीमा लागेर दुख गरेका मान्छेहरुभन्दा रातरात आएका मान्छेहरु हिरो हुन थालेपछि रास्वपाका पुराना र अर्गानिक कार्यकर्ता रुष्ट भएका छन् । कतिपयलाई त बालेनकै कारण पार्टी सभापति रवि लामिछाने ओझेल परेको बुझाइ पनि छ । र, धेरैले सहजै अनुमान गर्छन् कि, रवि–बालेनको एकता लामो समय टिक्दैन ।
हुन पनि हो, अतिमहत्वाकांक्षी दुई नेताको स्वभावदेखि विचारसम्ममा बेमेल छ । रवि अत्यन्तै बहिर्मुखी स्वभावका छन् भने बालेन रहस्यमयी र अन्तरमुखी स्वभावका छन् । यसले पनि उनीहरुको एकता नटिक्ने निश्चित छ । जे होस्, बालेनको इन्ट्रले ढिलोचाँडो रास्वपामा गम्भीर पहिरो जाने सम्भावना प्रबल छ ।
