सरकारविरुद्ध कडा ढंगमा उत्रिए सुदन गुरुङ, जेन जी समूहहरु पनि बालेनको विरोधमा

काठमाडैं । गृहमन्त्री ओमप्रकाश अर्याललाई हटाउन ‘हामी नेपाल’ एनजिओका संस्थापक सुदन गुरुङले प्रधानमन्त्री सुशीला कार्कीमाथि निरन्तर दबाब बढाइरहेका छन् । आफू निकट केही युवालाई पालैपालो सिंहदरबार र बालुवाटार पठाएर उनले प्रधानमन्त्रीलाई दबाब दिने गरेको बुझिएको छ ।

बताइएअनुसार सरकारले चुनावलाई प्राथमिकतामा राखेर काम गरिरहेको सुदनलाई खासै मन परिरहेको छैन । त्यसमाथि केपी ओली र रमेश लेखकलाई कारवाही नगरेकोमा उनी गृहमन्त्री अर्यालसँग आगो छन् । केही दिनअघि उनले ‘अलोकप्रिय गृहमन्त्रीलाई सन्देश’ भन्दै फेसबुकमा लामो स्टाटस लेखेर तत्काल पद छोड्न चेतावनी दिएका थिए ।

यता गृहमन्त्री अर्याललाई हटाउन नसकेको भन्दै काठमाडौँ महागरपालिकाका मेयर बालेन साह पनि प्रधानमन्त्री कार्कीसँग सन्तुष्ट छैनन् । उनको पनि ओली र लेखकलाई पक्राउ गर्न नसकेकोले गृहमन्त्री हटाउनुपर्यो भन्ने छ ।

र, रोचक के छ भने १२ वटा जेनजी समूह मिलेर बनेको ‘जेनजी मुभमेन्ट अलायन्स’ पनि यतिबेला बालेनविरुद्ध नै उत्रिएको छ । उनीहरुले सुकुम्बासीलाई विकल्प नदिइ डोजर नचलाउन चेतावनीसमेत दिएका छन् ।