काठमाडौं । आफूहरुको आन्दोलनमा रास्वपाको घुसपैठ भएको भन्दै जेन जीभित्रै विवाद उत्पन्न भएको छ । मंगलबार अस्भाविक क्षति हुनेगरी भएको प्रदर्शनका घटनाक्रमले पनि रास्वपाको नियतमाथि प्रश्न उठाएको छ ।
जेन जी आन्दोलनलाई धमिल्याएर रास्वपाले माछा मार्न खोजेको भनेर पनि चर्को टिप्पणी भइरहेको छ । कतिपय जेन जी अभियन्ताले रास्वपा सभापति रवि लामिछानेलाई जेलबाट छुटाउनु आफूहरुको उद्देश्य नभएको प्रतिक्रिया दिएका छन् ।
रास्वपाको मुद्दा चलिरहेको सर्वोच्च अदालत, मुद्दा चलाउने सरकारी वकिलको कार्यालय, रुपन्देहीको जिल्ला अदालत र बुटवलको उच्च अदालतमा प्रदर्शनकारीले आगो लगाएका छन् । यसरी छानीछानी रविविरुद्ध मुद्दा चलेका वा चलाइएका ठाउँमा आगो लाग्नुलाई पनि कतिपयले रहस्यका रुपमा हेरेका छन् । त्यतिमात्रै होइन, रविविरुद्ध आवाज निकाल्नेहरु पनि कोही बाँकी बसेनन् ।
रविविरुद्ध समाचार लेखको आरोप लगेको कान्तिपुर दैनिक पनि प्रदर्शनकारीको निसानामा पर्यो । कान्तिपुर टेलिभिजन र कान्तिपुर दैनिक मात्रै होइन, कान्तिपुरका प्रकाशक कैलाश सिरोहियाको निजी निवाससँगै उनको छोरा–बुहारी बस्ने घरलाई पनि प्रदर्शनकारीले जलाइदिए । त्यस्तै प्रायः रविविरुद्ध अभिव्यक्ति दिने अभिवक्ता रामनारायण बिडारीको घरमा पनि उनीहरुले आगो झोसिदिए ।
यसरी हेर्दा जेन जीको आन्दोलनमा रास्वपाले आफ्नो स्वार्थको रोटी सेकेको बुझ्न कठिन छैन । जेन जीलाई आफ्नो कार्यकर्ता ठानेर दुरुपयोग गर्ने अर्का व्यक्ति हुन्– रास्वपाका केन्द्रीय सदस्य गणेश कार्की । भीडलाई उत्तेजित पार्ने, रवि लामिछानेलाई जेलबाट छुटाउन भीडलाई नख्खुतिर लैजानेमा कार्कीको हात महत्वपूर्ण छ ।
त्यतिमात्रै होइन, राविलाई जेलमुक्त हुनका लागि कारागारले दिएको भनिएको पत्र पनि शंकास्पद देखिएको छ । पत्रमा लेखिएको मिति केरेर अर्को लेखिएको प्रष्ट देखिन्छ । जेन जी आन्दोलनलाई रास्वपाले मात्रै होइन, राप्रपादेखि माओवादीसम्मले आफूअनुकुल प्रयोग गर्न खोजेको देखिन्छ ।
