काठमाडौं । सामान्यतया विश्वका नेताहरू विदेश भ्रमणका लागि विमान रोज्छन्, तर उत्तर कोरियाका शासक किम जोङ उन भने आफ्नै विशेष बख्तरबंद रेल प्रयोग गर्छन् ।
सोमबार राजधानी प्योङयाङबाट चढेका उनी मंगलबार चीनको सीमामा प्रवेश गर्दै करिब १,३०० किलोमिटर लामो रेलयात्रा गरेर बेइजिङ पुगेका हुन् । यो रेल ‘तायेङहो’ नामले चिनिन्छ, जसको अर्थ “सूर्य” हुन्छ ।
बीबीसीका अनुसार यसको गति प्रति घण्टा ५० किलोमिटर मात्र छ । ढिलो भए पनि यो रेल सुरक्षा दृष्टिले निकै महत्त्वपूर्ण छ । मार्गमा बम वा अन्य खतरा हुन नदिन सुरक्षाकर्मीले स्टेशन र रेलमार्ग पहिल्यै स्क्यान गर्छन् ।
नोभेम्बर २००९ मा दक्षिण कोरियाली सञ्चारमाध्यमले यस बुलेटप्रुफ रेलमा करिब ९० वटा डब्बा भएको उल्लेख गरेको थियो । सम्मेलन कक्ष, शयनकक्ष, उपग्रह फोन, फ्ल्याट स्क्रिन टिभीदेखि लिएर विश्वका विभिन्न देशका परिकार अर्डर गर्न सकिने विशेष सुविधा यसमा छन् ।
