काठमाडौं, काठमाडौं महानगरकी उपमेयर सुनिता डंगोलले डुंगा प्वाल पारेर खोला तर्ने प्रयास नगर्न मेयर बालेन साहलाई चुनौती दिएकी छिन् । प्रमुख प्रशासकीय अधिकृतलाई मात्र दोष देखाएर बजेट लगायतका महत्वपूर्ण कार्यमा अवरोध पुर्याउन नहुने उपमेयर डंगोलको भनाइ छ ।
सामाजिक सञ्जालमा एक सन्देश सार्वजनिक गर्दै उनले आवेग र उत्तेजनामा होइन संयमित भएर बजेट ल्याउने प्रक्रियामा सहभागी हुन आग्रह गरेकी हुन् । काठमाडौं महानगरको नगर कार्यपालिकाको बैठक नबसेको ८–९ महिना भइसइसकेको छ । महिनैपिच्छे बस्नुपर्ने बैठक ८–९ महिनासम्म नबस्दा महानगरका थुप्रै–थुप्रै काम प्रभावित भएका छन् ।
कुनै नयाँ काम गर्नै सकेको छैन । बजेट खर्चको अवस्था निकै दयनीय छ । मेयर–उपमेयरबीच बोलचाल बन्द छ । मेयर र प्रमुख प्रशासकीय अधिकृतबीच पानी बाराबार छ । अरु वडाअध्यहरुलाई त मेयर शाह रहस्यमयी पात्र जस्ता लाग्छन् । जनताको प्रतिनिधि मेयर शाह जनताकै पहुँचभन्दा बाहिर छन् ।
महानगरविरुद्ध दिनुहुँजसो अनिमिताताको उजुरी परिरहन्छन् । यी सबै घटनाक्रमले पुष्टि गर्छ कि, काठमाडौं महानगरका मेयर बालेन साह पूर्णतः असफल भइसके । तर, यहाँ कोही भन्छन्– बालेनलाई कांग्रेस–एमालेका जनप्रतिनिधिले काम गर्नै दिएनन् । अर्थात् उनलाई असफल बनाउन कांग्रेस एमालेका कार्यकर्ता घुँडा धसेर लागेका छन् ।
यद्यपि, बुझ्न पर्ने कुरा यो छ कि, सफल नेता त्यो हो, जसले आफ्नो टिमका अधिकांशको मन जित्छ । तर दुर्भाग्य बालेनले महानगरमा आफ्नोबाहेक कसैको मन जित्न सकेनन् । र पनि उनका समर्थक यस्ता छन् कि– ललितपुरको ग्वार्कोमा ओभरपास बनेको जश पनि बालेनलाई नै दिइरहेका छन् । यसैबीच उपमेयर सुनिता डंगोलले बजेटका लागि एक्सन लिएकी छिन् ।
जसअनुसार उनले बुधबार आफ्नै अध्यक्षतामा बैठक राखेर बजेटबारे छलफल गरेकी छिन् । सम्भवतः उपमेयर सुनिताको पहलमा केही समयपछि नै भए पनि काठमाडौं महानगरको बजेट आउनेछ । र, फेरि पनि जश चाहिँ मेयर बालेनले नै पाउनेछन् । तर अश, अपजश जसले पाए पनि महानगरले बजेट ल्याउनै पर्छ ।
कोही–कसैको व्यक्तिगत इगोको सिकार काठमाडौं महानगरलाई बनाइनु हुँदैन ।
