काठमाडौं । निर्वाचन आयोग फेरि उपनिर्वाचनको तयारीमा जुटेको छ । पछिल्लो समय विभिन्न कालखण्डमा रिक्त भएका निर्वाचित पदहरुमा आयोगले उपनिर्वाचनको तयारी गरेको हो । उपनिर्वाचनको तयारीस्वरुप निर्वाचन आयोगले मतदाता नामावलीमा नाम दर्ता गर्न छुटेकाहरुलाई नाम दर्ता गराउन आग्रह गरेको छ । बिहीबार एक सूचना जारी गर्दै आयोगले निर्वाचनको मिति घोषणा भइसकेपछि दर्ता गराउन मिल्ने प्रावधान नभएकाले समयमै नामावली दर्ता गराउन आग्रह गरेको हो ।
२०७९ सालमा सम्पन्न निर्वाचनपछि विभिन्न कारणले रिक्त पदमा अयोगले छिट्टै नै निर्वाचनको मिति घोषणा गर्दैछ । यससँगै धेरैलाई चासो छ कि, चितवनबाट चुनाव जितेका रास्वपाका सभापति रवि लामिछाने, सिन्धुपाल्चोकबाट चुनाव जितेका कांग्रेसका मोहनबहादुर बस्नेत र रौतहटबाट चुनाव जितेका पूर्वप्रधानमन्त्री एवम् नेकपा एसका अध्यक्ष माधवकुमार नेपाललको पद के होला ? लामिछाने सहकारी ठगी, संगठित अपराध र सम्पत्ति शुद्धीकरणको मुद्दामा पुर्पक्षका लागि थुनामा छन् भने बस्नेत र नेपालविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दर्ता गरेको छ ।
यी तिनैजना सांसदको पद निलम्बनमा परेको छ । बुझिएअनुसर उनीहरुको पद निलम्बन मात्रै भएकाले उनीहरुले चुनाव जितेको क्षेत्रमा उपनिर्वाचन हुँदैन । यदि, अदालतबाट फैसला नै भएर उनीहरु दोषी ठहर भए भने मात्रै उक्त क्षेत्रमा पुन निर्वाचन हुन्छ । स्मरणीय छ कि, रवि लामिछाने चितवनबाट उपनिर्वाचन पनि जितेर सांसद भएका हुन् । यी नेताले जितेको ठाउँमा चुनाव नभए पनि देशका थुप्रै स्थानीय तहहरु जनप्रतिनिधिविहीन भएका छन् । दर्जनौं वडामा वडाध्यक्षहरु रिक्त छन् । यसअघि २०८१ साल मंसिर १६ गते पनि उपनिर्वाचन भएको थियो । अब उपनिर्वाचन हुँदा रुपन्देही– ३ र मनाङको १ ‘ख’मा चुनाव हुनेछ ।
रुपन्देहीमा राप्रपाबाट चुनाव जितेका सांसद दिपक बोहराको मृत्यु भएको हो भने मनाङका प्रदेशसभा सदस्य दीपक मनाङे फैजदारी कसुरमा जेल परेका छन् । निर्वाचित सांसद वा जनप्रतिनिधिको मृत्यु भएमा, राजीनामा वा बर्खास्तीपछि पद रिक्त भएमा, कुनै गम्भीर अभियोगमा दोषी ठहर भई कानुनी रूपमा पद गुमेवा र अदालतले मतगणना वा निर्वाचित व्यक्तिको उम्मेदवारी रद्द गरेमा पर रिक्त हुन्छ । र त्यहाँ उपनिर्वाचन हुने व्यवस्था छ ।
